Është thellësisht shqetësuese kur shkolla publike, që duhet të mbetet institucion laik dhe i barabartë për të gjithë nxënësit pa dallim bindjeje, shndërrohet në hapësirë ndikimi fetar. Arsimtarët nuk janë aty për t’iu nënshtruar as hoxhës, as priftit, as çfarëdo autoriteti fetar, por për t’i shërbyer dijes, edukimit qytetar dhe Kushtetutës së shtetit laik.

Nëse vërtet janë organizuar vizita të nxënësve në xhami gjatë orarit mësimor dhe janë shpërndarë materiale me përmbajtje ideologjike fetare në ambientet e shkollës, atëherë kjo tejkalon kufijtë e edukimit dhe prek drejtpërdrejt neutralitetin institucional që duhet ta ruajë shkolla publike.

Festat fetare respektohen nga të gjithë dhe dita zyrtare e pushimit është e garantuar me ligj. Por kjo nuk nënkupton riorganizime të fshehta, imponime apo aktivitete që favorizojnë një besim të caktuar brenda shkollës. Heshtja ndaj këtyre dukurive nuk është zgjidhje. Shkolla duhet të mbetet vend i dijes, jo i propagandës fetare apo i ndikimeve ideologjike mbi fëmijët.