Së pari ju falënderoj që e keni lexuar shkrimin tim, si dhe për komentin e bërë. Desha t’ju sqaroj se tema e shkrimit ka qenë një pikturë e quajtur “Marioneta”, një nga shumë pikturat që ndodhen në pjesën e mbetur të Murit të Berlinit. Unë e kam dërguar edhe këtë pikturë, por nuk e di pse nuk është publikuar.

Rrëfimin tim e kam shtjelluar (ose jam përpjekur ta shtjelloj) përmes kësaj pikture, si dhe mënyrën se si ka rrjedhur lustracioni kulturor në Gjermaninë e Bashkuar, duke përmendur disa shembuj. Keni të drejtë që ky proces shoqëror nuk ka ndodhur në Shqipëri e as në Kosovë. Për Kosovën kam folur pak, por këtë pjesë do ta zgjeroj. Po ashtu, sa të kem mundësi, edhe për Shqipërinë. Duhet ta kemi parasysh se procesi i shembjes së komunizmit ka specifikat e veta në çdo shoqëri.

Sa i përket kujtesës suaj për simbolin e ndarjeve të popujve në shtete të ndryshme, mendoj se ka dallime. Kufiri shqiptaro-shqiptar është një ndarje gjeostrategjike, ndërsa Muri i Berlinit është një ndarje ideologjike. Për Mynihun ju jap të drejtë, por më besoni se ka ardhur nga sigla (logoja) e e-mailit.

Jam i nderuar të hapim diskutime për këtë proces.

Me respekt,
Naim J. Krasniqi
Mynih