Disa ambasada të huaja në Kosovë u kanë dërguar një e-mail të brendshëm stafit të tyre, që të evitojnë turmat dhe qendrat e mëdha tregtare nëpër qytetet e Kosovës, pasi ka rrezik për një sulm.
Në këtë e-mail që e ka parë AP, thuhet se bëhet fjalë për “një sulmues të vetëm”.
Koha e mundshme për sulmin eventual është përcaktuar fundi i këtij muaji, saktësisht 30 nëntori.
Në këtë e-mail gjithashtu thuhet se policia lokale është duke monitoruar të dyshuarin.
Për të qenë të sigurt, të gjithë anëtarët e stafit janë këshilluar të mos vizitojnë zonat e mëdha tregtare, veçanërisht qendrat tregtare.
Burime brenda policisë gjithashtu kanë konfirmuar se u është kërkuar një shtim i forcave rreth këtyre qendrave, ku eventualisht është planifikuar sulm, porse një operacion operativ i organizuar nuk është dhënë.
Policët më të shumtë në numër aktualisht po bëjnë monitorime dhe vëzhgime për të siguruar perimetrin përreth këtyre qendrave.
Sulmi, siç mësohet është kategorizuar si “sulm i mundshëm terrorist”.
Zyrtarisht megjithatë, Policia e Kosovës asgjë nuk ka konfirmuar.
Për shkak të rrezikut nga një sulm i mundshëm, përfaqësues të diplomacive të huaja në Kosovë kanë paralajmëruar punonjësit e tyre që t’i shmangin turmat dhe qendrat e mëdha tregtare.
Ky paralajmërim ka arritur të sjellë reagime në vend për shkak të rrezikut që Kosova mund të përballet.
Në lidhje me këtë së fundmi ka reaguar Ambasada Amerikane në Kosovë, e cila ka publikuar një njoftim për shtetasit e saj, siç bën zakonisht në faqen travel.state.gov.
Të dhënat e publikuara për Kosovë, bëjnë të ditur që qytetarët duhet të kenë kujdes në lëvizjen e tyre pasi mund të ketë sulme potenciale nga grupe terroriste, përcjell “Bota sot”.
“Grupet terroriste vazhdojnë të komplotojnë sulme të mundshme në rajonin e Ballkanit, përfshirë Kosovën. Terroristët mund të sulmojnë me pak ose aspak paralajmërim, duke synuar vendndodhje turistike, qendra transporti, tregje/qendër tregtare, objekte të qeverisjes vendore, hotele, klube, restorante, vende kulti, parqe, ngjarje të mëdha sportive dhe kulturore, institucione arsimore, aeroporte dhe të tjera hapësira publike”, thuhet në udhëzimet e publikuara.
Në të dhënat e publikuara më 22 nëntor nga kjo faqe, thuhet se shtetasit amerikanë duhet të kenë kujdes dhe t’i rishqyrtojnë udhëtimet për në Mitrovicë të Veriut, Zveçan, Zubin Potok e Leposaviç për shkak të tensioneve dhe potencialit për trazira civile në atë pjesë.
