Një vit më parë, “profesorët” e kësaj akademie, harxhuan 50 milionë lekë për “studimin shkencor” që udhëzonte shqiptarët se si lanin duart, të mbanin maskat dhe të ruanin distancën fizike për t’u mbrojtur nga “Covid 19”
Fakti që po publikojmë, tregon se Akademia e Shkencave, institucioni i tjetërsuar në “azil” vegjetimi të një grupi familjarësh e shokësh të moshës së tretë, vërtetë nuk bën studime shkencore, por di të bëjë “shpikje” aferash korrupsioni me fondet financiare.
Bëhet fjalë, për pagesat që Akademia e Shkencave, ka kryer në datën 17 dhjetor 2021 për llogari të hotel “Plaza”-Tiranë, si shpenzime për 3 takime me kafe pritje-përcjellje, bankete, fjetje e qira sallash në këtë hotel luksoz.
FATURA E PARË/ Pagesë 43.7 milionë lekë të vjetra pa TVSH për “The Hotel Plaza” Tiranë, me objekt “Shpenzim për pritje, akomodim, qira ambjentesh”, kryer me Urdhër “Extra” nr. 56, datë 6.11.2021 e Faturë datë 30.11.21 dhe likujduar më 17.12.2021 nga Thesari i Shtetit.
FATURA E DYTË/ Pagesë 43.7 milionë lekë të vjetra pa TVSH për “The Hotel Plaza” Tiranë, me objekt “Shpenzim për materiale e shërbime speciale”, kryer me Urdhër “Extra” nr. 56, datë 6.11.2021 e Faturë datë 30.11.21 dhe likujduar më 17.12.2021 nga Thesari i Shtetit.
FATURA E TRETË/ Pagesë 43.7 milionë lekë të vjetra pa TVSH për “The Hotel Plaza” Tiranë, me objekt “Shpenzim për qira ambjentesh”, kryer me Urdhër nr. 56, datë 6.11.2021 e Faturë datë 30.11.21 dhe likujduar më 17.12.2021 nga Thesari i Shtetit.
FATURA E KATËRT/ Pagesë 261 mijë lekë të vjetra pa TVSH për “The Hotel Plaza” Tiranë, me objekt “Shpenzim pritje-përcjellje”, kryer me Urdhër nr. 56, datë 6.11.2021 e Faturë datë 30.11.2021 dhe likujduar më 17.12.2021 nga Thesari i Shtetit.
Fjetjet, darkat dhe banketet e dimë se çfarë janë, por nuk kuptojmë se çfarë janë “materialet e shërbimet speciale” që paskan kushtuar afro 44 milionë lekë të vjetra pa TVSH, kur dihet që në hotel Plaza, “shërbime speciale” janë vetëm kazinoja dhe suitat e qejfit për ministra, deputetë e bosë të mafies, sic ishin Françesco Zummo e Fabio Petruzella të “Cosa Nostra” më 17 qershor 2021, për të pastruar 18 milionë Euro me Rezart Taçin.
Saktësojmë, se pagesa e faturës së katërt me vlerë 261 mijë lekë të vjetra, është bërë për shpenzime për kafe në 3 mëngjese, që sipas llogarisë rezulton sa 60% e pagës mujore të një polici.
Po kështu, kujtojmë se 1 vit më parë, “profesorët” e kësaj akademie, harxhuan 50 milionë lekë të ndara me njeri-tjetrin, për “studimin shkencor” që udhëzonte shqiptarët se si lanin duart, të mbanin maskat dhe distancën fizike për t’u mbrojtur nga “Covid 19”./Pamfleti
