Vera Xerxa, Londër
Histori familjare
Murat Agë Vokshi i biri i Adem Agë Vokshit , vëllait të Sylejman Agë Vokshit, ishte gjyshi i nënës sime nga nëna e saj , Lejla Vokshi – Spahia.
Murat Agë Vokshi ishte njëri nga përfaqësuesit nga Gjakova në Kuvendin e Junikut, në maj të vitit 1912 , që i parapriu Pavarësisë së Shqipërisë po atë vit – nëntor 1912
Në Kuvendin e Junikut (21-25 maj 1912), në të cilin u miratua programi politik i Kryengritjës së Përgjithshme kundër sundimit osman, ku përfshihej edhe kërkesa për caktimin e gjuhës shqipe me alfabetin kombëtar si gjuhë zyrtare në administratë dhe në shkolla, bashkë me përfaqësuesit e tjerë nga Gjakova , si Riza beu, Ahmet beu, Hysni Curri dhe Hasan aga i Isa Zekës, mori pjesë edhe myderrizi Hasan efendi Shllaku.63 Hasan efendiu bashkë me krerët e tjerë të kryengritjës hyri në Prishtinë më 22 korrik 1912.
Shënime historike
KUVENDI I JUNIKUT
Besëlidhja e Junikut
Pas disa disfatave të pësuara pas vitit 1910 nëpër anë të ndryshme të Kosovës, u pa e udhës që të bëhej një riorganizim i përgjithshëm për të forcuar rezistencën kundër pushtuesve.
I pari që mori iniciativën për këtë ishte Hasan Prishtina. Ai kishte njoftuar dhe organizuar parinë e të gjitha vilajeteve të Kosovës që nga Prishtina, Drenica, Mitrovica, Gjilani, Kaqaniku për të kaluar në Dukagjin ku do të mblidheshin edhe paria e kësaj ane për t’u drejtuar në kuvendin e Besëlidhjes së Junikut. Hasan Prishtina arriti në Junik i shoqëruar nga, Sadik Rama, Ramë Binaku, Sylejman Lokaj, Isuf Musa etj. Me të arritur në Junik, u takua me krerët në Odën e Junikut dhe me shumë burra të tjerë nga Juniku e Reka. Pra këtu do të mbahej kuvendi Besëlidhja e Junikut diku në Maj 1912 e cila mblodhi shumicën e krerëve që përfaqësonin popullin e Kosovës. Ishin mbledhur më së 250 përfaqësues nga të gjitha vilajetet e Kosovës, ku ndër të tjerë ishin: Hasan Prishtina, Isa Boletini, Bajram Curri, Bajram Daklani, Ahmet Maxhuni, Xhemajl Berisha, Sadik R. Gjurgjeviku, Hasan Ferri, Qerim Begolli, Zenel Begu, pastaj Ramë Binaku, Haxhi Bajraktari, Hajdar Tafa, Nimon Bala, Sadri Azemi, Idriz Zeqa, Riza Kryeziu, Ahmet Begu, Sylejman Botusha, Zeqir Halili, Ibrahim Hoxha, Halil Ibrahimi, Rexhep Bajraktari, etj.
