Burimi: Ministria e Mbrojtjes së Serbisë, më 12 tetor 2021.
Nga: Liri Loshi, Kanada
Deklaratat politike nga politikanët kosovarë në kontekst dhe konotacion global, bëhen për të arritur efekte politike. Deklarata e Albin Kurtit për mundësinë e një shpërthimi të luftës në Kosovë ka pikërisht këtë qëllim. Përfitim politik për Kosovën është zbatimi i reciprocitetit sipas planit dhe kornizës kohore, pra që është nisur më një gusht dhe është pezulluar për një muaj.
Ata që përjashtojnë konfliktin si mundësi në një situatë kur grupet kriminale në Veri bllokojnë shtetin në realizimin e detyrave të tij dhe kur Serbia qartas mbështetë ato grupe, nuk e kuptojnë se mjafton një konfrontim serioz që me shpërthy konflikti i armatosur. Deklarata e kryeministrit Kurti është në harmoni me vlerësimet e qëndrave më të fuqishme dhe më të informuara në botë, të cilat edhe para se të fliste Kurti gjithnjë kanë tërhequr vërejtjen se nëse përhapet konflikti ruso-ukrainas, mundësia e parë e përfshirjes do të ishte Kosova, ku rusët po përpiqën ta bëjnë këtë përmes një Serbie që deri këtu është më shumë lojale ndaj Putinit sesa ndaj Evropës.
Deklarata e Albin Kurtit për mundësinë e luftës, nuk e provokon luftën, por e bën të kundërtën, sepse fton komunitetin ndërkombëtar që ta shtojë vemendjen ndaj Kosovës me qëllim që të mobilizohet seriozisht për ta penguar Serbinë në rast të një sulmi eventual. Është naivitet politik që ta injorosh shtetin armik, i cili çdo ditë koncentron forcat e veta ushtarake dhe kryen manovra të përbashkëta me ushtrinë ruse përgjatë kufirit me Kosovën.
Pra, Albin Kurti po paralajmëron se më një shtator nuk do të tolerohet bllokimi i rrugëve. Ata që besojnë në humanizmin dhe racionalitetin e Vuçiqit le ta kujtojnë deklaratën e tij famkeqe hitlero-fashiste që për një serb do t’i vriste njëqind muslimanë të Bosnes.
Deklarata e kryeminsitrit Kurti për mundësinë e shpërthimit të luftës nuk duhet të frikësojë, sepse Kosova nuk e sulmon askend. Por, Evropa duhet ta dijë se çfarë qasje duhet të mbajë ndaj Serbisë në këto momente delikate. Zgjidhja politike për reciprocitetin duhet të ndodh para një shtatorit 2022, përndryshe situata mund të eskalojë me konflikt.
Mjerisht, reagimet e opozitës janë vetëm refleksive dhe jo strategjike. Reagimet e tilla të orientuara në dobësimin e pozicionit politik të Kurtit, po kryejnë efekt krejt të kundërt, sepse po e përforcojnë atë. Por, problem i vërtetë është se ato janë të dëmshme për vendin. Një faktor politik i përçarë në çështjen e sovranitetot i konvenon vetëm palës ruse dhe serbe. Albin Kurti edhe me këtë deklaratë është një hap para opozitës dhe kritikuesve tjerë të tij.
