-Komiteti Olimpik i Kosovës: Kokën lartë heroina jonë!
-Presidentja e Kosovës, Vjosa Osmani: Majlinda për ne mbetet kampione olimpike e përhershme.
-Dje në Lojërat Olimpike në Tokio Flamuri i Kosovës u ngrit në majën më të lartë për të artën e kampiones Distria Krasniqi/
PRISHTINË, 25 Korrik 2021- Behlul Jashari
Kampionia olimpike e Rio 2016, e arta Majlinda Kelmendi e ekipit të Kosovës nuk arrin të vazhdojë tutje garat e xhudos në Lojërat Olimpike Tokio 2020.
Majlinda pësoi humbje në luftën e parë nga hungarezja Reka Pupp.
Një ëaz-ari i marrë në shënim të artë bëri që Majlinda Kelmendit t’i ndalet synimi për të fituar një tjetër medalje olimpike.
“Kokën lartë heroina jonë”, shkruan sot Komiteti Olimpik i Kosovës.
Majlinda nisi garën sot rreth orës 04:00 pas mesnate, sipas orës në Kosovë.
Presidentja e Republikës së Kosovës, Vjosa Osmani, nga arena “Nippon Budokan” në Tokio, ku ishte për ta parë e përkrahur nga afër të artën Majlinda Kelmendi ka shkruar:
“Majlinda për ne mbetet kampione olimpike e përhershme. Është ajo që i dha Kosovës shkëlqimin e saj të parë, ajo që e ndriçoi emrin e Kosovës para krejt botës, ajo që ngriti flamurin tonë atje ku nuk arrinte askush tjetër dhe bëri që të dëgjohej e nderohej himni ynë në vende që nuk na njohin.
Majlinda i solli Kosovës respekt më shumë se çdokush tjetër. Ajo i dha motiv çdo fëmije, çdo të riu, e mbi të gjitha çdo vajze, për të luftuar për ëndërrat e veta e për t’u ringritur gjithnjë pavarësisht sfidave.
Faleminderit kampione, për këto e shumëçka tjetër. Sepse ajo çfarë ke bërë ti për Kosovën tejkalon çdo medalje. Pavarësisht rezultatit të sotëm, ti tashmë ke realizuar ëndrrën e një populli të tërë.
Por jo vetëm falënderim Majlindë. Me ty jemi të gjithë, e arta jonë.
Majlinda është Kosova!”
Dje, xhudistja e Kosovës Distria Krasniqi u shpall kampione olimpike – fitoi medaljen e artë në Lojërat Olimpike në Tokio që në ditën e parë të garave – 24 Korrik 2021. Në ceremoninë e dorëzimit të medaljeve Flamuri i Republikës së Kosovës nën tingujt e Himnit Shtetëror u ngrit në majën më të lartë – për të arten historike në festën botërore të sportit…
