___

Në Long Island, në ujdhesën e New York-ut, një ndër vendet më të bukura të globit, të dielën u festua njëvjetori i themelimit dhe punës së suksesshme të shkollës së parë shqipe që mban emrin e poetit tonë kombëtar “Gjergj Fishta”. Ishte ky një moment gëzimi e lumturie për mbarë bashkësinë shqiptare në këtë vend, për të parë frytet e një angazhimi, ku shkolla shqipe, përpos edukimit të fëmijëve në gjuhën amtare është bërë edhe një pikë takimi e prindërve dhe familjeve shqiptare për të mbajtur gjallë frymën e origjinës dhe traditat e vendlindjes.

Në fjalën përshëndetëse, para të pranishmëve, krijuesi, publicisti dhe anëtari i Federatës Panshqiptare “Vatra”, Prend Ndoja, bëri thirrje që mos të mbetet asnjë fëmijë shqiptar në Long Island pa e njohur gjuhën shqipe, sepse, edukata e shëndoshë që sot e mbjellim në formimin e fëmijëve tanë, është vlerë jo vetëm për familjet tona, por për mbarë shoqërinë, si pjesë e vlerave universale.

Nëse ne si prindër hezitojmë t’i sjellim fëmijët në shkollën shqipe, në të ardhmen ata do të jenë vlerësuesit më të mirë se kush ishim ne sot dhe a e kemi përmbushur misionin tonë para tyre, tha z. Ndoja dhe falënderoi dr. Paulin Markun dhe profesoreshën, Fabiola Gjinaj, për punën e tyre vullnetare dhe me përkushtim që po e bëjnë për shkollën shqipe.

Long Island

Mesazhe inkurajimi dhe vlerësimi për punën e bërë pati në edhe në fjalën e gazetarit z. Frank Shkreli, të editorit të gazetës “Dielli”, z. Sokol Paja, të z. Ilir Cubi, anëtar i kryesisë së Federatës “Vatra” etj. ku u nënvizua përkushtimi dhe vlera e jashtëzakonshme për bashkësinë shqiptare në këtë pjesë të Amerikës dhe për të ardhmen e tyre.