Kryeministri në detyrë, Albin Kurti, ka reaguar lidhur me aktakuzën e ngritur më 8 dhjetor 2025 nga Prokuroria Speciale e Republikës së Kosovës, ndaj tre personave të dyshuar për shpërthimin terrorist në kanalin Ibër–Lepenc, ngjarje e ndodhur më 29 nëntor 2024.
Kurti përmes një postimi në Facebook, theksoi se aktakuza është rezultat i një bashkëpunimi të shkëlqyer ndërinstitucional dhe një hetimi të suksesshëm të zhvilluar nga institucionet e inteligjencës dhe sigurisë, si dhe nga partnerët ndërkombëtarë. Ai ritheksoi deklarimin që kishte bërë menjëherë pas shpërthimit, duke u bazuar në informacionet e sigurisë, se sulmi kishte ardhur nga Serbia.
Sipas tij, gjatë hetimeve janë mbledhur prova që tregojnë se tre të akuzuarit kishin qenë në vendin e ngjarjes natën e shpërthimit. Ai shprehu mirënjohje ndaj institucioneve të Republikës së Kosovës dhe FBI-së për punën profesionale në zbardhjen e rastit.
Kryeministri në detyrë deklaroi se, bazuar në informacionet e inteligjencës, të akuzuarit dyshohen të kenë qenë pjesë e strukturave ilegale të Serbisë dhe të përfshirë drejtpërdrejt në realizimin e sulmit terrorist. Ai shtoi se procesi gjyqësor do të dëshmojë lidhjen e tyre me këto struktura, përfshirë, sipas tij, edhe lidhjet me Millan Radoiçiqin dhe me segmente të tjera shtetërore serbe të cilat dyshohet se kanë planifikuar dhe urdhëruar sulmin.
Pas një bashkëpunimi të shkëlqyer, hetimi të suksesshëm të kryer nga institucionet relevante të inteligjencës dhe sigurisë, Prokuroria Speciale e Republikës së Kosovës, me datë 8 dhjetor 2025, ka ngritur aktakuzë ndaj tre personave lidhur me shpërthimin terrorist në kanalin e Ibër-Lepencit të datës 29 nëntor 2024.
Siç e kam thënë në konferencën e jashtëzakonshme, pak orë pas shpërthimit të kanalit, në bazë të informacioneve që kam marrë nga institucionet e sigurisë, sulmi ka ardhur nga Serbia, fqinji ynë verior, agresiv e armiqësor.
Tashmë është në rrugë të mbarë hetimi i këtij rasti, ku janë siguruar prova se pikërisht tre serbët e akuzuar ishin në vendin e ngjarjes natën kritike, për ç’gjë falënderoj institucionet përkatëse të Republikës së Kosovës dhe FBI-në nga Shtetet e Bashkuara të Amerikës për punën profesionale të kryer në këtë rast.
Mund t’ju siguroj se, në bazë të informacioneve të inteligjencës, të akuzuarit kanë qenë pjesë e strukturave ilegale të Serbisë dhe janë në mesin e të përfshirëve në realizim të sulmit.
Përkundër faktit se Beogradi zyrtar mohonte përgjegjësinë dhe u angazhua fuqishëm përmes veprimeve hibride në dezinformimin e opinionit, duke ngritur dyshime nga më të ndryshmet për përgjegjësit apo motivet e aktit terrorist, aktakuza e ngritur dhe epilogu i rastit, pa fije dyshimi, do të konfirmojnë të dhënat dhe vlerësimet e institucioneve të Republikës së Kosovës, të cilat me siguri të plotë i kam thënë edhe më parë në dy konferenca për medie (më 29.11.2024: https://kryeministri.rks-gov.net/…/adresimi-i…/ dhe më 24.12.2024: https://kryeministri.rks-gov.net/…/adresimi-i-plote-i…/) si dhe gjatë vizitës në Varagë të nesërmen (https://www.facebook.com/share/p/1AaYQ1whaq/?mibextid=wwXIfr).
Integriteti territorial, sovraniteti i shtetit tonë, sundimi i rendit dhe ligjit për të gjithë qytetarët pa dallim, janë vlera jetike për të cilat angazhohemi ditë e natë dhe për të cilat nuk do të ndalemi asnjëherë. Rasti i fundit dëshmon që në Kosovë nuk kalon pa ndëshkim terrorizmi, sado perfid të jetë, dhe nuk mund të kalojë pa u vërejtur dhe dekonstruktuar dezinformimi.
Falënderojmë institucionet e sigurisë, partnerët ndërkombëtarë në krye me ShBA-të, institucionet, aktorët tjerë dhe qytetarët, për kontributin që po ofrojnë për një Kosovë gjithnjë e më të sigurt e paqësore, më të fuqishme në aspektin ekonomik, ligjor, integrues dhe demokratik.
