Pamje e sulmeve të Federatës Ruse në Kiev të Ukrainës
Isuf Bajraktari, Suedi
Paralajmërimet për përshkallëzim global kërkojnë diplomaci serioze dhe mendim strategjik, luks që Kosova nuk ka të drejtë ta anashkalojë.
Paralajmërimet e fundit nga ekspertë ndërkombëtarë të sigurisë për rrezikun real të një konflikti global nuk janë retorikë alarmiste, por vlerësime të bazuara në ndryshime të thella strukturore në arkitekturën e sigurisë botërore. Në rrethana të tilla, çdo shtet i përgjegjshëm është i obliguar të rishikojë pozicionimin e tij strategjik, të forcojë aleancat dhe të artikulojë qartë interesat e veta.
Kosova, fatkeqësisht, duket se po e trajton këtë realitet me një dozë shqetësuese vetëkënaqësie politike. Klasa politike vazhdon të mbetet e zhytur në dinamika të brendshme, debate ditore dhe përplasje partiake, duke lënë në hije zhvillimet globale që ndikojnë drejtpërdrejt në sigurinë dhe të ardhmen e vendit. Kjo qasje nuk është thjesht mungesë vëmendjeje, por shenjë e mungesës së një vizioni strategjik afatgjatë.
Si shtet i vogël, me sovranitet ende të kontestuar dhe me mbështetje ndërkombëtare jetike për stabilitetin e tij, Kosova nuk e ka luksin e improvizimit në politikën e jashtme. Mungesa e një strategjie të qartë diplomatike, reagimi pasiv ndaj zhvillimeve ndërkombëtare dhe komunikimi i paartikuluar me aleatët përbëjnë dobësi serioze shtetërore, për të cilat përgjegjësia bie drejtpërdrejt mbi udhëheqjen politike.
Ndërtimi dhe ruajtja e besimit me aleatët strategjikë, leximi realist i interesave gjeopolitike dhe angazhimi aktiv në diplomacinë shumëpalëshe nuk janë çështje preference politike apo marketingu elektoral. Ato janë domosdoshmëri ekzistenciale. Çdo krizë globale, në mungesë të një pozicionimi të mençur dhe të koordinuar, mund të ketë pasoja disproporcionale për një shtet me kapacitete të kufizuara si Kosova.
Në një botë ku rendi ndërkombëtar po riformësohet me shpejtësi dhe paqartësi, Kosova nuk mund të përballojë luksin e mungesës së strategjisë. Ajo ka nevojë urgjente për diplomaci profesionale, mendim shtetëror dhe një klasë politike që e kupton se siguria, aleancat dhe respekti ndërkombëtar nuk janë të dhëna të përhershme, por ndërtohen dhe mirëmbahen çdo ditë me përgjegjësi dhe vizion.
