Selatin Retkoceri, Llugagji, Lipjan
Fillimi i zbatimit të ligjit për qëndrimin e qytetarëve të huaj në Kosovë dhe ligjit për veturat, që rrjedhin nga marrëveshja e Brukselit dhe aneksi i Ohrit, përfaqëson lëshimin më të madh politik ndaj Serbisë që nga shpallja e pavarësisë së Kosovës.
Për 18 vite me radhë, asnjë qeveri nuk kishte shkuar kaq larg në krijimin e një realiteti të ri politik në veri. Ironia më e madhe është se këtë po e bën pikërisht Albin Kurti, njeriu që dikur deklaronte me vetëbesim se “nuk e di si duket presioni ndërkombëtar”.
Sot po shihet qartë: jo vetëm që e ka parë presionin, por është përkulur para tij më shumë se kushdo tjetër. Nga dita e diel ka filluar zbatimi praktik i asaj që po quhet “vetëmenaxhim” i veriut.
Në thelb, kjo nënkupton rrugën drejt një autonomie substanciale për veriun e Kosovës me kompetenca ekzekutive dhe me lidhje më të forta me Beogradin sesa me Prishtinën.
Me fjalë të tjera, po ndërtohet gradualisht një shtet brenda shtetit. Pra, problemi nuk është vetëm se Kurti “lëshoi pe”.
Problemi është se ai sot po zbaton pikërisht marrëveshjet që dikur i kundërshtonte me protesta në rrugë. Ky është paradoksi më i madh politik në Kosovë: ai që dikur e quante tradhti çdo kompromis me Serbinë, sot po i zbaton vetë ato marrëveshje.
Nëse ky kurs vazhdon, brenda pak vitesh veriu i Kosovës rrezikon të funksionojë si një entitet me autonomi reale dhe me ndikim të drejtpërdrejtë të Beogradit. Kjo nuk është më teori politike. Kjo është një realitet që po ndërtohet para syve tanë.
Prandaj ata qytetarë që ia dhanë Vetëvendosjes mbi 51.11% të votave duhet sot ta pyesin veten me seriozitet: çfarë i bëmë Kosovës me këtë votim plebishitar?
Sepse retorika revolucionare e dikurshme është shndërruar në zbatim të heshtur të marrëveshjeve që rrezikojnë sovranitetin e shtetit dhe të ardhmen tonë euroatlantike. Historia na ka mësuar se shtetet nuk dobësohen vetëm nga armiqtë e jashtëm.
Shpesh ato dobësohen nga vendimet e gabuara të atyre që qeverisin në emër të popullit. Dhe sot, fatkeqësisht, Kosova po përballet pikërisht me këtë rrezik që mund të përkufizohet:
1. “Nga protestues kundër marrëveshjeve, në zbatues të autonomisë së veriut: transformimi politik i Kurtit”
2. “51% votë për ndryshim, sot rrezik për një shtet brenda shtetit në veri”
3. “Kurti dikur thoshte se nuk e njeh presionin ndërkombëtar, sot po e zbaton marrëveshjen më të rrezikshme për Kosovën”
