Sot, shkolla ku punoj u detyrua të më çbllokojë nga faqja publike e shkollës sime “Dr.Shaban Hashani”, jo si favor, por si një e drejtë që nuk është dashur të cenohej kurrë.
Dikur, në periudhat komuniste, diferencimi politik bëhej duke larguar njerëz nga puna, duke i izoluar apo duke ua mbyllur zërin vetëm pse mendonin ndryshe.
Sot format kanë ndryshuar, por mentaliteti dhe kjo mendësi, sidomos te disa individë që e kanë përjetuar atë periudhë, fatkeqësisht ende mbetet e njëjtë.
Për shkak të një status tim publik, të para du viteve: “Selam alejkum”( https://www.facebook.com/share/p/1D53MySVhq/ ), ku nuk shaja e as nuk fyeja askend, dhe i shpërndarë më vonë edhe nga 73 shpërndarës, ku trajtoja çështjen e laicitetit në institucione dhe apostrofoja (u bëja tag) udhëheqësve të institucioneve shtetërore, komunale e arsimore, liderëve politikë dhe menaxhmentit të shkollës ku punoj, por këtyre të fundit nuk u pëlqeu qëndrimi im ideopolitik i shprehur në faqen time personale në Facebook!?
Si pasojë, më bllokuan në faqen publike të shkollës, duke ma pamundësuar qasjen dhe ndërveprimin aty.
Unë as që e kisha vërejtur këtë bllokadë për vite me radhë, derisa desha të shihja disa aktivitete sportive që kishin të bënin me nxënësit dhe me mua si profesor sporti. Por ishte e pamundur. Aty më shfaqej njoftimi: “Kjo përmbajtje nuk është e disponueshme….” si në (foto).
Më shqetësuese se vetë bllokimi ishte insistimi mospërfillës dhe dhelpërak për muaj të tërë i menaxhmentit të shkollës dhe administruesit të faqes se: “Nuk je i bllokuar, ke ndonjë problem teknik dhe s’kemi çfarë të bëjmë…..”, edhe pse realiteti dhe faktet e shkencës së informatikës që ju ofroja dëshmonin të kundërtën.
Unë besoj se ka kaluar koha e diferencimeve ideopolitike. Demokracia nuk mbrohet duke heshtur apo shtypur mendimin ndryshe, por duke u përballur me argumente. Liria e shprehjes nuk vlen vetëm për ata që pajtohen me ne, por sidomos për ata që kanë guximin të mendojnë dhe të shprehen ndryshe e publikisht.
Pas shumë insistimeve të mia dhe denoncimeve në DKA, sot ajo bllokadë u hoq. Jo si favor, por si një e drejtë që nuk është dashur të cenohej kurrë.
Dua t’ua kujtoj individëve me mendësi të epokës së kaluar se demokracia dhe liria e shprehjes janë vlera që u përkasin të gjithëve. Ato sot nuk mund të shtypen e as të bllokohen.
Ia vlejti të luftohej për këtë. Sidomos për ndjenjën e drejtësisë kur i sheh ata që tentuan ta bllokojnë fjalën e lirë, të dorëzuar, kokëulur para rregullave të demokracisë dhe të drejtës për t’u shprehur lirshëm.
Rrnoftë liria e shprehjes!
