Nga Bajram Rama
____
Anëtar i “Diplomatics of Peace” (PBF) – Aktivist për të Drejtat e Njeriut
Vendimi i Shqipërisë për ta shpallur Igballe Hudutin person non grata është një veprim i drejtë dhe i nevojshëm. Ky vendim tregon se shteti shqiptar nuk mund të qëndrojë indiferent ndaj figurave që, përmes deklaratave publike, krijojnë paqartësi, tensione apo lidhje të dyshimta me agjenda që nuk i shërbejnë interesit kombëtar shqiptar.
Në kohë të ndjeshme gjeopolitike, çdo deklaratë publike që prek çështje fetare, ideologjike apo politike duhet të trajtohet me seriozitet të lartë. Sidomos kur në këto deklarata përmenden emra të udhëheqësve shtetërorë, qytetarët kanë të drejtë të kërkojnë sqarime, transparencë dhe përgjegjësi.
Shqipëria e ka qëlluar drejt me këtë vendim. Por kjo çështje nuk duhet të përfundojë vetëm me një emër. Institucionet përgjegjëse duhet të shikojnë më thellë dhe të zbardhin se kush janë personat, grupet apo rrjetet që mund të fshihen pas Igballe Hudutit dhe deklaratave të saj publike.
Nëse ka persona që veprojnë në prapaskenë, që përdorin figura publike për të shtyrë agjenda të huaja, fetare apo politike, ata duhet të identifikohen dhe të ekspozohen para opinionit publik. Siguria kombëtare nuk mbrohet me heshtje, por me veprime të qarta, të matura dhe institucionale.
Pres që edhe partnerët ndërkombëtarë, përfshirë Washingtonin, ta ndjekin me kujdes këtë çështje. Nëse faktet tregojnë se pas kësaj veprimtarie qëndrojnë individë apo struktura që dëmtojnë interesat e Kosovës, Shqipërisë dhe aleatëve perëndimorë, atëherë edhe ata duhet të përballen me pasoja politike dhe diplomatike.
Kosova dhe Shqipëria nuk kanë nevojë për afërsi të dyshimta me regjime apo struktura që nuk e njohin shtetësinë e Kosovës dhe që nuk përputhen me orientimin tonë euroatlantik. Rruga jonë është e qartë: me SHBA-në, Bashkimin Evropian dhe NATO-n.
Çdo figurë publike që përdor fenë, ideologjinë apo emrat e udhëheqësve shtetërorë për të krijuar ndikim politik duhet të mbajë përgjegjësi. Po ashtu, çdo udhëheqës që përmendet në këto kontekste duhet të dalë qartë dhe të distancohet, nëse nuk ka lidhje me këto deklarata.
Heshtja në këto raste nuk ndihmon askënd. Ajo vetëm krijon dyshime, ushqen spekulime dhe dobëson besimin qytetar. Prandaj sot më shumë se kurrë kërkohet qartësi, transparencë dhe qëndrim i prerë.
Shqipëria e dha sinjalin e parë. Tani mbetet që edhe institucionet e tjera dhe partnerët ndërkombëtarë të veprojnë me të njëjtën seriozitet ndaj kujtdo që mund të jetë i përfshirë në prapaskenë.
Interesi kombëtar nuk negociohet. Siguria, sovraniteti dhe orientimi perëndimor i shqiptarëve duhet të mbrohen me çdo mjet demokratik, ligjor dhe diplomatik.
