Në protestën e Tiranës, ish-drejtori i Policisë së Shtetit, Mit’hat Havari, para qytetarëve dhe para brezit të ri, ngriti kritika të ashpra ndaj Edi Ramës.
Në fjalën e tij ai përmendi edhe Ramush Haradinajn e Ali Ahmetin, duke shprehur pakënaqësinë e tij për qëndrimet e tyre politike. Ajo që më bëri përshtypje ishte se në atë shesh folën edhe të rinjtë, madje edhe vajza e tij. Kjo tregon se pakënaqësitë dhe debatet politike nuk po mbeten vetëm te brezi i vjetër, por po kalojnë edhe te brezat e rinj.
Unë, Sak Muji, si ish i burgosur politik dhe veprimtar i çështjes kombëtare, besoj se çdo politikan – qoftë Edi Rama në Shqipëri, Ramush Haradinaj në Kosovë apo Ali Ahmeti në Maqedoninë e Veriut – duhet të dëgjojë zërin e qytetarëve dhe t’u përgjigjet pyetjeve të popullit. Pushteti nuk është pronë e askujt; ai buron nga qytetari dhe kthehet te qytetari. Shqipëria, Kosova dhe trojet shqiptare kanë nevojë për më shumë përgjegjësi, më shumë transparencë dhe më shumë respekt për interesin kombëtar.
Emrat ndryshojnë, qeveritë ndryshojnë, por Kombi Shqiptar mbetet.
Nga Çakorri në Rugovë e deri te Sazani e Vlora, populli shqiptar ka të drejtë të ngrejë pyetje dhe të kërkojë llogari. Shumë qytetarë të Kosovës vazhdojnë ta kundërshtojnë marrëveshjen e demarkacionit me Malin e Zi, të miratuar në kohën e Hashim Thaçit, Isa Mustafës dhe Ramush Haradinajt, duke e konsideruar atë një dëm për interesat kombëtare.
Për këtë arsye, sot ka shqiptarë që shprehen: ‘Nëse nuk u dëgjua zëri i popullit për Rugovën e Çakorrin, si të mos shqetësohemi për Sazanin e Vlorën?’ Prandaj rinia dhe qytetarët që protestojnë në Tiranë kërkojnë transparencë, llogaridhënie dhe respekt për pasuritë kombëtare. Ata kundërshtojnë çdo vendim që sipas tyre cenon interesin publik dhe kërkojnë që çdo përgjegjësi të trajtohet nga drejtësia dhe institucionet ligjore.
As Çakorri, as Rugova, as Sazani, as Vlora nuk janë pronë e politikanëve.
Ato janë pjesë e trashëgimisë së kombit shqiptar dhe duhet të mbrohen me përgjegjësi para historisë dhe brezave që vijnë. Flet qytetari. Flet rinia. Flet ndërgjegjja kombëtare. 
Sak Muji,Rugovë
