Prof. Dr. Sadri Ramabaja, Prishtinë
“Shtëpia e Lirisë”, si e cilësojnë disa “demokratë të shpifur” selinë e PD-së, për fat të keq, në sy të opinionit, sot u shndërrua në vend krimi, rrjedhimisht në “Varrin e lirisë”.
E djathta shqiptare (PD), aq sa ajo mund të cilësohet, sa edhe e majta shqiptare (PS), po aq sa mund të cilësohet e majtë, u vunë tërësisht nën kontrollin e oligokratëve që ka kohë që koketojnë me Beogradin dhe Athinën në dëm të interesit të Kombit!
Kjo që ndodhi sot me PD dhe emblemën e saj, nëse nuk ndërgjegjësohemi shpejt, mund të ndodhë pa humbur shumë kohë, edhe me PS dhe selinë e saj, meqë sot publikisht u inaugurua dhuna ilegale e opozitës reale, por edhe dhuna legale e shtetit.
Pamjet që opinioni publik pati rastin t’i përcjellë shpërfaqin shqeto mjerimin tonë politik. Prandaj, dita e sotme vete në histori si ditë turpi për politikën shqiptare.
Sot e tutje, qytetarët sa herë kalojnë para selisë së PD-së, lirsht mund të venë një tufë lulesh e të bëjnë homazh për vdekjen, jo vetëm të PD-së. Ndërkaq ky ndërgjegjësim do t’i bëjë të qartë secilit prej nesh se, po sot, u inaugurua diktatura autoritariste e Njëshit!
Çasti historik kërkon rikompozim të pozicionit qytetar. Shqipërisë politike i duhet, si vet buka e uji, një forcë reale opozitare që në esencë do të udhëhiqej nga filozofia e nacionalizmit progresiv.
