Pasqyra e kohës…, sipas Arif Ejupit!

Nga: Arif Ejupi, Gjenevë

Pasqyrë e kohës 

1. Po të kishte barazi e drejtësi, s’do të ekzistonte lufta për liri. 

1. Po të mos ishin të buta fotelet, Kuvendi do të mbetej bosh. 

1. Vetëm ata që janë faqezinj e shfrytëzojnë imunitetin për hajni. 

1. Mali ia jep bishtin sëpatës; i dehuri i vë flakën shtëpisë. 

1. Zagari shkërmoqet duke vrapuar, gjahun e merr tjetërkush. 

1. S’kemi ende ushtri, se të gjithë jemi bërë gjeneralë e komandantë. 

1. Avokati të shumtën e herëve mbron të keqin. 

1. Opozita i bie daulles, e lojën e luan pozita. 

1. Ata që i vjedhin votat, i vjedhin edhe milionat. 

1. Rrahagjoksi thotë se bën mur, por s’di ç ‘është as llaçi as gdhendja e gurit. 

1. Më mirë pa shkollë se me mësues dhaskal. 

1. Të gjithë përpiqen të gjallërojnë ditën; vetëm hajdutët dhe huti natën. 

1. Lepujve edhe zogjtë në fluturim ua prishin zemrën. 

1. Bleta pickon, por edhe shëron; gjarpri vetëm helmon. 

1. Druri i lindur për sëpatë, bari për kosë. 

1. Kushtoni kujdes zemrës, jo flokut. 

1. Mulliri me ujë është i Zotit, ai me rrymë i njeriut. 

1. Edhe kur Zoti u fal pasuri të vegjëlve, ua rrëmbejnë të mëdhenjtë. 

1. Dielli largon errësirën, libri analfabetizmin. 

1. Shiu i qetë ushqen bimët, njeriu i urtë e i dashur zemrat. 

1. Fillimisht mat forcën, pastaj dikto lojën. 

1. Dashuria dhe fqinjësia e mirë kërkojnë reciprocitet. 

1. Letrën dhe pjatën mos i mbushni me gjëra të pavlera, se ua prishin disponimin dhe stomakun. 

1. Njeriun e bën luftëtar robëria; kafshën agresive mungesa e ushqimit. 

1. Politika në skenë sjell edhe ata që nuk u besohet as një tufë delesh. 

1. Njeriun e bën atdhetar guximi dhe dashuria për vendin; tradhtari lind me instinktin e nënshtrimit dhe pabesisë. 

1. Ende bëhet garë për themelimin e UÇK-së, edhe pse dihet se ajo u themelua nga ata që vdiqën me armë në duar. 

1. Idealistët burgjet dhe dajakun; horrat pozitat dhe privilegjet. 

1. Të bësh biznes dhe dallavere me serbët e maqedonasit do të thotë të pajtohesh me turpin. 

1. Vota në Kosovë është në pikë të hallit — brenda jepet për një darkë a drekë, në mërgim për pension moshe dhe shtesa fëmijërore. 

Më 22 janar 2026