Një aktivitet i organizuar në Shkodër nga ambasada turke në kuadër të 18 Marsit, luftën e Çanakalasë, ka ngjallur polemika.
Kritikat më të forta kanë ardhur nga famullitari i Kuklit, dom Nikë Ukgjini, që e konsideron të papranueshme përfshirjen e nxënësve të shkollës artistike “Prenkë Jakova”, në këtë aktivitet.
Më herët Instituti “Yunus Emre” bëri të ditur se cili është qëllimi i këtij aktiviteti.
Ja statusi i dom Nikë Ukgjinit:
BEFASI NË SHKODËR : – INDOKTRINIMI I NXËNËSVE TË PAFAJSHËM!
MË 18 MARSI – FITORJA E ÇANAKALASË DHE DITA PËRKUJTIMORE E DËSHMORËVE
Manipulimi edhe më nxënësit e shkollës se Mesme Artistike “Prenkë Jakova!
Është momenti i fundit, kur autoritetet e qeverisjes së Shkodrës, duhet të japinë llogari ligjore dhe morale, për pjesëmarrjen në organizimin e këtyre ngjarjeve të organizuara në Shkodër, nga Ambasada Turke në vendin tonë.
Në veçanti është e papranueshme manipulimi më nxënësit e shkollës së Mesme Artistike “Prenkë Jakova” duke i bëre pjesë aktive të këtyre ngjarjeve të shumë të diskutueshme për historinë tonë.
Gjeja më e vogël për momentin është dorëheqja e menjëhershme e drejtuesve të arsimit në Shkodër.
Statusi i Institutit Yunus Emre:
Në kuadër të 18 Marsit – Fitorja e Çanakalasë dhe Dita Përkujtimore e Dëshmorëve, nën kujdesin e Ambasadës së Republikës së Turqisë në Tiranë, në bashkëpunim me Institutin tonë dhe Shkollën e Mesme Artistike “Prenkë Jakova” në Shkodër, u organizua Koncerti “Fitorja e Çanakalasë”.
Gjatë koncertit u interpretuan vepra që pasqyrojnë shpirtin e Çanakalasë, ndërsa nxënësit e shkollës artistike prezantuan edhe performanca instrumentale.
Pas koncertit, i cili u ndoq me mjaft interes, aktiviteti përkujtimor vijoi në Maarif Campus Shkodër, ku u përkujtuan me nderim ushtarët nga Shkodra që ranë dëshmorë në Luftën e Çanakalasë, ndërsa shfaqja oratorike e realizuar nga nxënësit u vlerësua shumë nga të pranishmit.
Falenderojmë nxënësit, mësuesit, drejtorin e Shkollës së Mesme Artistike “Prenkë Jakova”, z. Anton Kaftalli, si dhe drejtorin e Maarif Campus në Shkodër, z. Harun Kocaman, për kontributin e tyre të vyer.
