Kur S’Ke Argument, Flet për “Din e Iman”
Kur politika zbret në nivelin e “din e imanit”, aty përfundon argumenti dhe fillon dembelia intelektuale. Sulmi i Artan Behramit ndaj Albin Kurtit nuk është kritikë politike, por moralizim primitiv për konsum partiak.
Kosova nuk ka nevojë për hoxhallarë politikë që matin kundërshtarët me “iman”, por për debat me fakte, përgjegjësi dhe argumente konkrete. E fakte për këtë qeveri ka sa të duash: abuzime me pushtetin, skandale me tenderë, kapje institucioneve, degradim ekonomik, propagandë dhe arrogancë politike. Por kur nuk ke kapacitet me i artikulu këto politikisht e juridikisht, atëherë strehohesh te “pa fe”, “pa moral” dhe “zullumqar”.
Kjo është varfëri mendimi. Është ikje nga debati real. Në një shtet laik dhe demokratik, politika nuk matet me “din e iman”, por me ligj, integritet institucional dhe rezultat.
Me e sulmu kundërshtarin si “pa fe” nuk të bën më patriot, më moral apo më të mençur. Veç tregon që ke mbetur pa argument dhe po tenton me ndez emocionet primitive të turmës.
Kur politika përdor fenë si armë për linçim publik, ajo nuk e mbron moralin — e degradon debatin publik dhe e kthen shoqërinë prapa.
