Sot u hap për vizitorët Shtëpia Muze e shkrimtarit të njohur për fëmijë, Ymer Elshani. Ky ishte një çast i veçantë jo vetëm për familjen e tij, por edhe për letërsinë shqipe, arsimin dhe kulturën kombëtare.
Që në orët e para të ditës, njerëz nga vise të ndryshme të vendit, nxënës shkollash, mësimdhënës, dashamirë të librit dhe miq të poetit vërshuan drejt kësaj shtëpie për të parë nga afër vendin ku jetoi e krijoi Ymer Elshani. Ata u njohën me bibliotekën e tij, dorëshkrimet, librat, fotografitë dhe shumë kujtime të tjera që dëshmojnë jetën dhe veprën e shkrimtarit.
Në pragun e kësaj shtëpie, vizitorët i priste me ngrohtësi e bija e poetit, Teuta, së bashku me fëmijët dhe familjarët e mbijetuar nga lufta.
Prania e tyre i dha ceremonisë një dimension të veçantë emocional. Në atë shtëpi nuk flitej vetëm për krijimtarinë e një shkrimtari, por edhe për një familje që përjetoi tragjedinë e luftës, duke ruajtur me dinjitet trashëgiminë shpirtërore të babait të tyre.
Hapja e Shtëpisë Muze është një akt mirënjohjeje ndaj jetës dhe veprës së Ymer Elshanit, i cili me librat e tij edukoi dhe frymëzoi breza të tërë fëmijësh shqiptarë. Kjo shtëpi tashmë nuk do të jetë vetëm një muze, por një vatër kujtese, kulture dhe frymëzimi, ku brezat e rinj do të njihen me botën krijuese të autorit dhe me vlerat që ai la pas.
Le të mbetet kjo shtëpi një dritare e hapur drejt kujtesës sonë kombëtare, një vend ku emri dhe vepra e Ymer Elshanit do të jetojnë përgjithmonë, duke u përcjellë brezave dashurinë për librin, dijen dhe atdheun.
