Luan – Asllan Dibrani, Gjermani
UÇK-ja nuk lindi në minare, nuk u krijua nga institucione fetare dhe nuk ishte projekt i ndonjë shteti të Lindjes. Ajo lindi nga represioni serb, nga burgosjet, vrasjet, dëbimet dhe rezistenca shqiptare për liri.
Pikërisht për këtë arsye, sot duhet kujdes kur historia e saj vishet me petk fetar.
Më 15 shtator 2026, Kryesia e Bashkësisë Islame të Kosovës, me vendim të nënshkruar nga Myftiu Naim Tërnava, kërkoi që flamuri i UÇK-së të vendosej edhe në minaret e xhamive. BIK-u e paraqiti këtë si solidaritet dhe nderim për UÇK-në.
Por pyetja mbetet:
A ka nevojë UÇK-ja për minare që të dëshmohet patriotizmi i saj?
A bëhet Prekazi më shqiptar?
A bëhet Adem Jashari më i madh?
A bëhet lufta më e drejtë?
Jo.
Një luftëtar mund të ketë qenë mysliman, katolik, laik apo me bindje të tjera. Por besimi personal i luftëtarit nuk e bën automatikisht luftën fetare.
Luftëtari mund të ketë pasur fe. UÇK-ja nuk kishte fe zyrtare.
Edhe flamuri kombëtar nuk ka nevojë për vulë shtesë. Shqiponja dykrenare është më e vjetër se partitë, institucionet fetare dhe organizatat e sotme. Ajo është simbol i të gjithë shqiptarëve.
Këtu qëndron rreziku.
Serbia ka përdorur prej dekadash propagandë për ta paraqitur rezistencën shqiptare si “terrorizëm” dhe për ta lidhur Kosovën me fundamentalizëm. Pikërisht për këtë arsye, çdo fotografi që e lidh UÇK-në me simbolikë fetare mund të nxirret nga konteksti dhe të përdoret kundër Kosovës.
Një shqiptar mund ta shohë flamurin mbi minare dhe të mendojë: solidaritet.
Një propagandist mund ta marrë të njëjtën fotografi dhe të shkruajë: “Ja karakteri fetar i UÇK-së.”
Dhe fotografia udhëton më shpejt se sqarimi.
Prandaj problemi nuk është feja dhe as besimtari.
Problemi është përvetësimi ideologjik i historisë.
Nëse një imam ka ndihmuar luftën, le të nderohet me emër dhe dokument. Nëse një prift ka ndihmuar civilë, le të nderohet. Nëse një qytetar pa përkatësi fetare ka dhënë jetën, respekti duhet të jetë i njëjtë.
Por një rast individual nuk e ndryshon karakterin e një lufte të tërë.
Prekazi nuk kishte nevojë për minare.
Adem Jashari nuk kishte nevojë për vulë fetare.
Ahmet Krasniqi nuk duhet përdorur kundër UÇK-së.
Dhe UÇK-ja nuk duhet përdorur për t’i dhënë kapital patriotik askujt.
UÇK-ja nuk është pronë e një feje, partie apo institucioni.
Ajo është pjesë e historisë së Kosovës.
Prandaj:
Feja le të mbetet besim.
Flamuri kombëtar le të mbetet i të gjithëve.
UÇK-ja le të mbetet histori kombëtare.
Sepse historia nuk bëhet më e madhe duke i shtuar dekor.
Bëhet më e fortë duke ia ruajtur të vërtetën.
Nga Prekazi te minaret e xhamive , pyetja është e thjeshtë: a po e nderojmë UÇK-në, apo po përpiqemi ta bëjmë të ngjajë me ideologjitë e islamizmit politik?
Prekazi e ka dhënë përgjigjen prej kohësh ajo është kombi jo feja:
UÇK-ja ishte e Kosovës. Dhe aty duhet të mbetet pa ideologji islamike .
