Publicisti dhe veprimtari Milazim Maraj ka kritikuar organizimin dhe efektin e protestave lidhur me Ligjin për Dhomat e Specializuara të Kosovës, duke vlerësuar se ato nuk mund të ndryshojnë marrëveshjet ndërkombëtare dhe se çështja duhej të trajtohej përmes argumenteve juridike dhe konsultimeve me ekspertë.

Sipas Marajt, protestat nuk patën efektin e synuar publik, ndërsa debati rreth ligjit u shoqërua, sipas tij, me kalkulime politike dhe përpjekje për të ushtruar presion ndaj deputetëve.

“Këto janë protesta pa efekt për qëllimin publik që u organizuan. Asnjë ligj nuk ka fuqi retroaktive”, ka deklaruar Maraj për ‘Bota sot’, duke shtuar se ndryshimet ligjore nuk mund të ndikojnë vetvetiu në marrëveshjet e Kosovës me institucionet ndërkombëtare.

Ai ka vlerësuar se marrëveshjet politike të zhvilluara rreth kësaj çështjeje kishin edhe karakter të fushatës partiake, si brenda subjekteve politike, ashtu edhe në raportet ndërmjet tyre. Sipas tij, këto zhvillime u shfrytëzuan edhe në funksion të përfundimit të formimit të institucioneve dhe shmangies së zgjedhjeve të reja.

Ai ka theksuar se paralajmërimet e partnerëve ndërkombëtarë për respektimin e marrëveshjeve ekzistuese duhej të merreshin më seriozisht, pasi, sipas tij, vendimet e institucioneve të Kosovës kanë pasoja përtej zhvillimeve të brendshme politike.

“Euforia nuk garanton fitore. Pastaj njerëzit në rrugë nuk mund të kontrollohen dhe të mbahen drejt qëllimit të planifikuar. Aty mund të depërtojnë interesa të ndryshme, me misionarë të ndryshëm”, ka thënë Maraj, duke vënë në pikëpyetje strategjinë dhe përgatitjen paraprake të protestave.

Sipas tij, para organizimit të protestave duhet të vlerësohen qartë kauza, objektivat, mënyra e organizimit dhe mundësitë reale për arritjen e rezultateve të synuara. Ai ka theksuar se çështjet me rëndësi juridike duhet të mbështeten në argumente dhe analiza profesionale, e jo vetëm në mobilizim publik.

Duke komentuar kthimin e ligjit në Kuvend për rishqyrtim, Maraj ka ngritur pikëpyetje për pasojat që mund të kishte pasur procedimi i tij pa adresuar shqetësimet e ngritura. Ai vlerëson se zhvillimet e fundit mund të sjellin zhgënjim te familjet e të dënuarve, të dëmtojnë besimin në Kuvend dhe të krijojnë përshtypjen se vendimet ligjore merren nën presion.

Ai ka paralajmëruar gjithashtu se përpjekjet për të ndryshuar kornizën ligjore pa vlerësuar marrëveshjet ndërkombëtare mund të përdoren nga kundërshtarët e Kosovës për të vënë në pikëpyetje funksionimin e shtetit të së drejtës.

Në këtë kontekst, Maraj ka vlerësuar se përpjekjet për të kundërshtuar vendimet e Gjykatës Speciale duhet të përqendrohen në rrugët ligjore dhe në paraqitjen e materialeve relevante pranë organeve gjyqësore kompetente.

“Për të gjitha këto kishte kohë dhe arsye të përgatiteshin me ekspertë juridikë të Kosovës dhe jashtë Kosovës, që të përgatitnin dëshmi që nuk janë përfshirë gjatë këtij gjykimi dhe të dërgohen në Gjykatën e Apelit si material relevant”, ka theksuar ai.

Maraj i është referuar edhe qëndrimit të Bashkimit Evropian për kthimin e ligjit në Kuvend nga presidentja Justina Shiroka Pula për rishqyrtim, duke e parë këtë zhvillim si një mundësi për t’i trajtuar çështjet e ngritura përmes procedurave institucionale.

Ai ka kritikuar paralajmërimet për protesta të tjera dhe mundësinë e anulimit të votimit për presidenten, duke i cilësuar ato si shenja të vazhdimit të presionit politik.

Në përfundim, Maraj ka theksuar se çështje të tilla kërkojnë profesionalizëm, durim dhe maturi, ndërsa ka paralajmëruar se presioni ndaj deputetëve nuk është mënyrë e qëndrueshme për të zgjidhur mosmarrëveshjet politike.

“Studimi i këtyre proceseve kërkon kujdes, profesionalizëm, durim dhe shumë maturi”, ka përfunduar Maraj.