Deklaratë ndaj rrafshimit dhe largimit të tre varreve të të parëve të Isniqit, të të ndjerëve Canë Leka, Nikë Leka dhe Prekë Leka

Shoqata Intelektuale “Isniqi nga Isniqi” shpreh indinjatën dhe kundërshtimin e saj të qartë dhe të prerë ndaj rrafshimit dhe largimit të tre varreve të të parëve të Isniqit në varrezat e Ibrdemajve, që i përkisnin të ndjerëve Canë Leka, Nikë Leka dhe Prekë Leka.

Ky veprim përbën një cenim të rëndë të kujtesës historike, të dinjitetit të të parëve tanë dhe të trashëgimisë kulturore e ADN_shpirtërore e Isniqit. Varret nuk janë vetëm struktura fizike, por dëshmi të gjalla të ekzistencës, identitetit dhe vazhdimësisë së një komuniteti ndër breza.

Fakti që këto varre i përkisnin besimit katolik e bën edhe më të domosdoshme ruajtjen dhe trajtimin e tyre me respekt të veçantë, si pjesë e historisë fetare dhe shoqërore të Isniqasve. Çdo ndërhyrje në to, e aq më tepër rrafshimi apo zhdukja e tyre pa transparencë të plotë dhe pa konsultim me familjarët dhe komunitetin, është e papranueshme dhe e dënueshme moralisht dhe kombtarisht.

Shoqata vlerëson se ky akt nuk prek vetëm familjarët e të ndjerëve pra Isniqasve, por përbën humbje për kujtesën kolektive të Isniqit dhe krijon një precedent të rrezikshëm në raport me vazhdimsin dhe trashëgiminë tonë fetare dhe historike.

Në këtë drejtim, kërkojmë përgjegjësi institucionale dhe sqarim të plotë mbi rrethanat e këtij veprimi, si dhe masa të menjëhershme për mbrojtjen e çdo dëshmie historike dhe kulturore që lidhet me të kaluarën fetare,kombetare te komunitetit tonë.

Shoqata Intelektuale “Isniqi ”nga Isniqi thekson se ruajtja e varrezave dhe respekti ndaj të parëve nuk janë vetëm obligim moral dhe kulturor, por edhe detyrim ndaj identitetit tonë historik dhe kombëtar.

“Ruajtja e varrezave nuk është vetëm një akt kujtese, por një detyrim moral dhe patriotik ndaj vazhdimësisë së qenies sonë kolektive; sepse një popull që humb respektin për të vdekurit e vet, rrezikon të humbë edhe ndërgjegjen e vet historike, identitetin kulturor dhe dinjitetin e së ardhmes që ndërton mbi kujtimin e të kaluarës.”