Mentor I. Barani, Prishtinë
Kryetari i Shoqatës së Industrisë së Qumështit të Kosovës (SHIQK), Gani Durmishi, ka reaguar ndaj pretendimeve lidhur me udhëheqjen e shoqatës dhe proceseve të saj zgjedhore duke kërkuar që çështja të trajtohet në institucionet kompetente.
Durmishi ka ngritur pyetjen nëse “ka shtet, ligje dhe institucione që duhet t’i respektojmë të gjithë” duke thënë se personi që pretendon se ka udhëhequr SHIQK-në ka vazhduar të paraqitet si kryetar, ndonëse, sipas tij, dokumentet dhe proceset zgjedhore dëshmojnë ndryshe.
Ai ka ngritur gjithashtu pretendime serioze lidhur me përdorimin e nënshkrimeve të anëtarëve të shoqatës duke theksuar se kjo çështje duhet të trajtohet dhe të vërtetohet nga institucionet kompetente.
Sipas Durmishit, në vitin 2017 është mbajtur Kuvendi i SHIQK-së, është përpiluar procesverbali dhe janë zhvilluar zgjedhjet e reja, ku ai është zgjedhur kryetar. Dokumentacioni përkatës, sipas tij, është dorëzuar në institucionet kompetente dhe në dokumentet zyrtare ai është paraqitur si kryetar i SHIQK-së.
Durmishi thotë se që nga ajo kohë janë zhvilluar edhe dy procese të tjera zgjedhore, në të cilat ai është zgjedhur kryetar nga përfaqësuesit e 28 qumështoreve të Kosovës.
“Deri në mbajtjen e zgjedhjeve të reja, Gani Durmishi është kryetar i zgjedhur i Shoqatës”, thuhet në reagim.
Lidhur me pretendimin e Ramadan Memajt se Gjykata e Apelit e ka kthyer lëndën, Durmishi ka deklaruar se kjo çështje është trajtuar më herët nga gjykatat kompetente dhe, sipas dokumentacionit që posedon SHIQK, pretendimet përkatëse janë hedhur poshtë. Ai ka bërë të ditur se së fundmi është iniciuar përsëri procedurë gjyqësore lidhur me këtë çështje.
Durmishi ka paralajmëruar se për veprimet, deklaratat dhe pretendimet e bëra ndaj SHIQK-së dhe drejtuesve të saj do të kërkohet përcaktimi i përgjegjësisë nga organet kompetente dhe gjykatat.
“Ne i besojmë ligjit dhe institucioneve të Republikës së Kosovës dhe jemi të gatshëm që çdo çështje ta ballafaqojmë me dokumente dhe prova para institucioneve kompetente”, përfundon reagimi i kryetarit të SHIQK-së.
