Luan Dibrani , Durrës
Ka njerëz që nuk maten me fjalë, por me jetë, me vuajtje, me burg, me sakrificë dhe me qëndresë. Një nga këta njerëz është Gani Krasniqi, atdhetar i dëshmuar, luftëtar i çështjes kombëtare dhe kandidat i Lëvizjes Vetëvendosje, në listën 116, me numër rendor 49.
Gani Krasniqi nuk është emër i rastësishëm në jetën tonë kombëtare. Ai vjen nga një familje me rrënjë të thella patriotike, nga një derë që në të kaluarën ka dhënë dije, qëndresë dhe sakrificë për Kosovën dhe për shqiptarinë. Nga rrënjët e Selman Krasniqit dhe Vesel Pagarushës, ai trashëgoi dashurinë për gjuhën shqipe, për lirinë dhe për dinjitetin kombëtar.
Unë e njoh Gani Krasniqin jo vetëm si emër publik, por si shok burgu, si bashkëvuajtës dhe si njeri të idealeve të pathyeshme. Ne ishim bashkë në burgjet famëkeqe të ish-Jugosllavisë, aty ku shqiptari dënohej pse kërkonte liri, barazi dhe të drejta kombëtare. Në veçanti, kujtimi i burgut famëkeq të Nishit mbetet plagë e rëndë në kujtesën tonë. Ai burg ishte varri shpirtëror e fizik i shumë ish të burgosurve politikë shqiptarë; vend i torturave, i vuajtjeve, i poshtërimit dhe i përpjekjes për ta thyer njeriun shqiptar.
Por Gani Krasniqi nuk u thye. Ai qëndroi burrërisht, me dinjitet dhe me besim të palëkundur në çështjen kombëtare. Në familjen e tij qëndrojnë edhe dy emra të shenjtë për lirinë e Kosovës: Ymer Krasniqi dhe Labinot Krasniqi, dy djemtë e dashur të Gani Krasniqit, dy yjet që dikur ishin gëzimi, krenaria dhe drita e kësaj shtëpie. Ata nuk ishin vetëm bij të një familjeje, por bij të atdheut.
Me rininë, me ëndrrat dhe me gjakun e tyre, ata u bënë pjesë e altarit të lirisë së Kosovës. Rënia e tyre është plagë e madhe për familjen Krasniqi, por njëkohësisht është nder i përjetshëm për kombin shqiptar. Kjo dëshmon se Gani Krasniqi dhe familja e tij nuk i kanë shërbyer kombit vetëm me fjalë, por me gjënë më të shtrenjtë që ka njeriu: me bijtë e vet, me gjak, me vuajtje, me sakrificë dhe me besnikëri të pathyeshme ndaj atdheut.
Sot, kur Kosova ka nevojë për njerëz me histori, me moral, me karakter dhe me të kaluar të pastër kombëtare, Gani Krasniqi është një nga ata që meriton përkrahjen tonë. Ai nuk vjen para qytetarit me premtime të zbrazëta, por me një jetë të tërë të vendosur në shërbim të atdheut.
Prandaj, me respekt dhe me ndjenjë të thellë përgjegjësie, i bëj thirrje çdo qytetari që e çmon sakrificën, qëndresën dhe historinë tonë kombëtare: votën tuaj t’ia besoni Gani Krasniqit – numër 49, në listën 116 të Lëvizjes Vetëvendosje.
Vota për Gani Krasniqin nuk është vetëm votë për një kandidat. Është votë për burgun e paharruar politik, për dëshmorët, për familjet që i dhanë Kosovës gjakun e bijve të tyre, për dinjitetin kombëtar dhe për një përfaqësim më të denjë në Kuvendin e Kosovës. Ta mbështesim Gani Krasniqin – numër 49! Ta mbështesim listën 116 të Vetëvendosjes! Sepse njerëzit që kanë vuajtur për lirinë, që kanë dhënë familjarë për atdheun dhe që kanë qëndruar të pathyeshëm në kohët më të rënda, meritojnë të jenë zëri ynë në institucionet e Republikës së Kosovës.
Lavdi dëshmorëve Ymer dhe Labinot Krasniqi!
Nderim për të gjithë ish të burgosurit politikë shqiptarë! Respekt për Gani Krasniqin, shokun tonë të burgut dhe atdhetarin e madh të çështjes kombëtare!
