KUR SHTETI LAIK HESHT, BOSHLLËKUN E MBUSHIN TË TJERËT !
Lajmi se mbi 150 fëmijë të moshës 7 deri në 16 vjeç kanë nisur kursin veror në Xhaminë Qendrore “Bajrampasha Isa Beg” në Mitrovicë nuk duhet parë thjesht si një aktivitet veror. Ai duhet të shërbejë si një alarm për institucionet e arsimit dhe të pushtetit lokal.
Po e shkruaj këtë reagim si veteran i arsimit, me përvojë shumëvjeçare si në Kosovë, ashtu edhe në diasporë. Kam qenë pjesë e organizimit të shkollave dhe kurseve verore ku fëmijët mësonin gjuhën shqipe, historinë kombëtare, letërsinë, kulturën, traditat, artin dhe edukimin qytetar. Qëllimi ynë ishte formimi i një brezi të ditur, kritik në mendim, krenar për identitetin e tij dhe i përgatitur për jetën në një shoqëri demokratike.
Sot shtrohet pyetja: ku janë institucionet e shtetit?
Kosova është republikë demokratike dhe shtet laik. Kjo do të thotë se shteti respekton lirinë e besimit për të gjithë, por njëkohësisht ka detyrimin të mos e lërë edukimin e brezit të ri pa alternativa publike cilësore.
Askush nuk ua mohon bashkësive fetare të drejtën për të organizuar aktivitetet e tyre për besimtarët. Kjo është e drejtë kushtetuese. Mirëpo, është po aq legjitime të pyesim pse komunat, Ministria e Arsimit, bibliotekat, qendrat rinore, institucionet kulturore dhe sportive nuk organizojnë në të njëjtën masë kampe verore, shkolla të gjuhës shqipe, aktivitete shkencore, artistike, sportive dhe kulturore për fëmijët.
Kur shteti mungon, dikush tjetër e mbush atë hapësirë.
Nuk është problem që një xhami organizon kurs veror. Problemi lind kur institucionet shtetërore nuk ofrojnë alternativa të mjaftueshme dhe edukimi joformal i fëmijëve mbetet pothuajse vetëm në dorën e institucioneve fetare.
Si mësimdhënës kam besuar gjithmonë se prioriteti i fëmijës duhet të jetë shkolla, dija, shkenca, libri dhe mendimi kritik. Edukimi qytetar nuk ndërtohet vetëm mbi bindjet fetare, por edhe mbi njohjen e historisë sonë, kulturës shqiptare, respektimin e ligjit, barazinë, të drejtat e njeriut dhe përgjegjësinë ndaj shoqërisë.
Në opinion janë ngritur shpesh shqetësime se në disa raste nxënës largohen nga aktivitetet shkollore për të marrë pjesë në rituale fetare. Këto raste, kur ndodhin, duhet të trajtohen me seriozitet nga institucionet arsimore, sepse arsimi duhet të mbetet përparësi.
Nuk mund të mos shtroj edhe një pyetje tjetër: a janë drejtuesit komunalë në pushim, apo e konsiderojnë këtë situatë normale? Heshtja institucionale nuk është zgjidhje. Fëmijët kanë nevojë për më shumë mundësi, jo për më pak.
Sot më shumë se kurrë Kosovës i nevojitet një strategji kombëtare për aktivitetet verore të fëmijëve dhe të rinjve. Shkollat, komunat, universitetet, bibliotekat, muzetë, qendrat sportive dhe organizatat kulturore duhet të bashkëpunojnë për të krijuar programe që zhvillojnë dijen, talentin, kreativitetin dhe identitetin qytetar.
Thuhet me të drejtë se armiku nuk pushon derisa të arrijë qëllimin e vet. Për këtë arsye, as shteti nuk duhet të pushojë së kryeri detyrën e tij më të rëndësishme: edukimin e brezit të ri.
Një shtet i fortë nuk ndërtohet vetëm me ligje dhe institucione. Ai ndërtohet duke investuar çdo ditë në arsimin, kulturën dhe ndërgjegjen qytetare të fëmijëve të tij.
Kosova ka nevojë për më shumë shkolla verore e më pak boshllëqe institucionale. Sepse aty ku mungon shteti, gjithmonë do të gjendet dikush tjetër për ta zënë vendin e tij. 
