Shkodër – Sot, me angazhimin e Shoqatës Atdhetare “Dukagjini”, nën drejtimin e kryetarit të saj, Ndue Sanaj u zhvillua ceremonia e vendosjes së një pllake përkujtimore në vendin ku, në vitin 1859, Marie Mici, e njohur gjerësisht si Kushe Mici, hapi shkollën e parë femërore në trevat shqiptare.
Në këtë veprimtari përkujtimore morën pjesë nënkryetarja e Bashkisë Shkodër, Teuta Qyteza, nënkryetari i Bashkisë Malësi e Madhe, Sitki Ndrecaj, konsulli i Nderit i Republikës së Austrisë në Shkodër, Gjergj Liqejza, intelektualë të njohur shkodranë, studiues dhe qytetarë.
Mbi.jetën e Kushe Micit dhe shkollën femërore të saj foli Prof. Dr. Zenepe Dibra.
Ky aktivitet shërben si një homazh për një nismë të rëndësishme arsimore dhe kulturore, duke rikthyer në kujtesën publike rolin e grave që kontribuan në hapjen e rrugës së arsimimit dhe emancipimit të vajzave dhe grave shqiptare.
