Çështja e 20 përqindëshit për punonjësit e gazetës “Rilindja”, por edhe të ndërmarrjes “Rilindja”, ende nuk ka përfunduar. Një pjesë e mjeteve që i kishte ndarë Qeveria në fund të vitit 2021 ende mbahen “peng” dhe nuk u janë shpërndarë punëtorëve, me arsyetimin se ende ka ankesa të pakryera në Dhomën e Posaçme.
Ndërkohë, procesi i pagesës së 20 përqindëshit për truallin prej 5.5 hektarësh as që ka filluar. Kohë më parë, zyrtarë të AKP-së kishin deklaruar se mjetet për privatizimin e truallit të kompleksit “Rilindja” i kishte marrë Komuna e Prishtinës. Mirëpo, pas hulumtimit të kësaj çështjeje dhe padisë së ngritur në Prokurori, doli e kundërta.
Komuna e Prishtinës nuk ka marrë asnjë mjet për këtë çështje, madje as Qeveria nuk ka paguar mjete për truallin. Këtë e pohuan të njëjtit zyrtarë të AKP-së në takimin e djeshëm me sindikalistët e gazetës: Igballe Rexha, Zeqir Bekolli dhe Besim Kajtazi.
Meqë janë shterur të gjitha mundësitë për zgjidhjen e kësaj çështjeje, grupi i sindikalistëve autorizoi një avokat, i cili do ta ndjekë ligjërisht çështjen e truallit, në mënyrë që punonjësit e ndërmarrjes “Rilindja” ta realizojnë 20 përqindëshin edhe për truallin.
Për procedurat e mëtejme, punëtorët do të njoftohen me kohë.
