Po ta kishin mbrojur politikanët tanë interesin e Luginës së Preshevës, atje do të kishin protestuar me kërkesë për një asociacion sikur ky që e kërkon Beogradi

Është mbase momenti i fundit kur kemi urgjentisht obligim të përkrahim qasjen e një politike të jashtme këmbëngulëse dhe të përdorim të gjitha mundësitë ekzistuese ta forcojmë pozitën negociuese të Kosovës, me çfarëdo mjetesh. Sidomos duhet lënë anash inatet partiake naive, e duhet diskutuar strategjia mes krerëve politikë për tu dakorduar në favor të çështjes kombëtare. Merrni disa këshilltarë që marrin vesh nga politikat e sigurisë, strategjitë e luftës dhe të drejtat ndërkombëtare. Krejt është çështje kalkulimesh e shteteve tjera, harroni romanticizmat e miqësive. Edhe kryesorja, mos mendoni se jeni të pagabueshëm.

***

Rrethanat gjeopolitike të favorshme janë si një dritare që hapet për një kohë të kufizuar, e kur ajo mbyllet, ka ikur shansi. Përkundër që është në interes të Perëndimit që Serbia të integrohet në BE, kartat e Serbisë për momentin janë më të dobëta, sepse nuk guxon të jetë e ashpër, meqë Perëndimi në asnjë mënyrë nuk do të lejonte një konflikt në Kosovë, as edhe atëherë kur Rusia do të kërcënonte se i ndihmon Serbisë. Arsyeja për këtë është se kufiri i Perëndimit tani është në Ukrainë, dhe një forcim i Serbisë përpos që gjithmonë nënkupton se Ballkani do të mbetet i trazuar në të ardhmen, do ta mundësonte rikthimin e ndikimit rus në Ballkan dhe më gjerë. BE-ja mbase nuk e çan kokën aq shumë, por sigurtë që për Amerikën ky skenar do të ishte i papranueshëm, pas gjithë atij investimi që Rusia të dobësohet.