Sak Muji, Dukaivë, Rugovë
RAMIZ MEHMET MUJAJ – NJË DËSHMI E GJALLË E RUGOVËS
Për Portalin DRINI
Ka intervista që dëgjohen për disa minuta dhe harrohen. Por ka edhe rrëfime që mbeten si dëshmi për brezat. E tillë ishte intervista mbi 30-minutëshe e vëllait tim të dytë, Ramiz Mehmet Mujaj, në TV Dukagjini, të cilin e përgëzoj për realizimin dhe ruajtjen e kësaj dëshmie me vlerë historike, kulturore dhe njerëzore.
Ramizi është i dyti ndër 11 fëmijët e Mehmet dhe Hajrije Mujaj, në një familje me gjashtë vëllezër dhe pesë motra, e rritur në Rugovën krenare, mes bjeshkëve, kullave, sakrificës dhe dashurisë për tokën e të parëve.
Gjatë intervistës, ai nuk foli me gjuhën e politikës, por me gjuhën e kujtesës.
Nuk kërkoi lavdi për veten, por solli dëshmi për Rugovën, për jetën e brezit tonë, për mërgimin, për artin, për natyrën dhe për historinë që po largohet bashkë me njerëzit që e kanë jetuar.
Me qetësinë e një njeriu që ka parë shumë, Ramizi dokumentoi Rugovën e dikurshme, jetën e familjeve rugovase, rrugëtimin e vet jetësor dhe kontributin që ka dhënë ndër dekada. Veçanërisht më prekën dy mendime të tij.
I pari: “Problemi më i madh është që historianët dhe politikanët nuk janë marrë me faktin se edhe një Rugovë tjetër është prej Bogës deri në Ivangrad.”
Një fjali e shkurtër, por me peshë të madhe historike. Një thirrje që historia e Rugovës të studiohet më thellë, me dokumente, me kujtesë dhe me respekt për të kaluarën.
I dyti: “Kaniherë ma merr mendja që unë kam ardhë dhunshëm këtu. Për 40 vite kam dhanë më së paku 150.000 ose 200.000 dollarë, pare kesh, për çashtjen shqiptare.” Në ato pak fjalë pashë historinë e një brezi të tërë mërgimtarësh shqiptarë. Pashë mundin e viteve, punën e rëndë, sakrificën familjare dhe ndihmën e pandërprerë për atdheun, pa kërkuar as dekorata e as lavdërime.
Ramizi foli edhe për artin e tij, për lulet që i ka dashur gjithmonë, për vizatimet, për natyrën dhe për Rugovën që e ka mbajtur në zemër gjatë gjithë jetës. Ndoshta dikush mund të vërejë se ai nuk përmendi shumë emra. Por për mua kjo nuk ka rëndësi. Sepse kur ai flet për Rugovën, aty janë prindërit tanë Mehmeti dhe Hajrija.
Aty janë gjashtë vëllezërit dhe pesë motrat. Aty janë të gjithë ata që e ndërtuan jetën me ndershmëri dhe sakrificë. Si vëllai i tij, ndjeva krenari duke e dëgjuar. Jo vetëm për atë që tha, por edhe për mënyrën si e tha: me maturi, me dinjitet dhe me dashuri për vendlindjen.
Në një kohë kur shumë kujtime po humbin, intervista e Ramiz Mehmet Mujajt mbetet një dokument i vlefshëm për Rugovën, për mërgatën shqiptare dhe për brezin që dha shumë për kombin, pa kërkuar asgjë në këmbim. Faleminderit TV Dukagjini për këtë intervistë. Faleminderit Ramiz, për dëshminë, kujtesën dhe dashurinë që vazhdon t’ia dhurosh Rugovës.
- Sak Muji Vëllai i madh i Ramiz Mehmet Mujajt . Ish i burgosur politik 1981–1990 Rugovë – Pejë – Zvicër
- https://youtu.be/3Wd8wc_2heo?si=1oot90y28gUnRjlo
- Korrik 2026
“Si jetuam” – Pas 40 vitesh Amerikë, kthehet përgjithmonë në Rugovë
