Bardhyl Mahmuti, politolog, Zvicër
___
Në kohën kur regjimi totalitar komunist i BRSS-së kishte përcaktuar si strategji globale të krijojë një “epërsi ushtarake më të fuqishme se të gjithë armiqtë e komunizmit së bashku”, presidenti republikan i SHBA-ve, Ronald Reagan e gjunjëzoi “mbretërinë e së keqes” dhe i hapi rrugë procesit të demokratizimit të shteteve të Europës, të cilat pas përfundimit të Luftës së Dytë Botërore u ¨ballafaquan me sistemet totalitare njëpartiake”.
Mirëpo mungesa e vendosmërisë që tregoi Barack Obama gjatë dy mandateve presidenciale, pati si rezultat negativ rikthimin e fuqishëm të Rusisë putiniane në skenën politike ndërkombëtare dhe përforcimin e asaj që presidenti George W. Bush e cilësoi si “Bosht i së Keqes”.
I trimëruar nga indiferenca e Barack Obamës, Vlladimir Putini shpalosi hapur ambiciet për të rikthyer nën tutelën e Rusisë, shtetet që dikur ishin nën influencën sovjetike. Agresioni ndaj Ukrainës ishte hapi i parë drejt realizimit të abicieve ekspansioniste ruse.
Ndërkohë që “Bosht i së Keqes” u mobilizua tërësisht në ndihmë të Rusisë (me armatim, me njerëz dhe me përfshirjen në shmangien e sanksioneve që iu vendosën Rusisë), administrata e presidentit Biden dhe shtetet e demokracive perëndimore nuk përmbushën as 10 % të premtimeve që iu bënë Ukrainës.
Meqenëse gjatë garës së fundit presidenciale, ish-presidenti amerikan Donald Trump premtoi se do ta përfundonte luftën në Ukrainë shumnë shpejt, ndërsa, siç bëjnë me dije mediat, pas fitores më 5 nëntor 2024, presidenti Trump i ka kërkuar Putinit të mos e përkeqësojë gjendjen në Ukrainë.
Intensifikimi i bombardimeve ruse të caqeve civile në Ukrainë dhe mospërfillja e rekomandimeve të Donald Trumpit, kanë shtruar dilema të mëdha. Sidoqoftë, shumica e njohësve të politkës amerikane vijnë tek i njëjti konstatim: republikanët nuk do t’i gjunjëzohen Vlladimir Putinit!
