Saim Tahiraj për ekspozitën kushtuar njërit ndër figurat më të shquara të lëvizjes sonë për liri dhe pavarësi – prof. Fehmi Aganit

Saim Tahiraj, Cyrih

I nderuari konsull i Republikës së Kosovës në Cyrih, z. Vigan Berisha,

I nderuari ambasador i Republikës së Kosovës z.Mentor Latifi

Të nderuar përfaqësues të Muzeut Kombëtar, zotërinj Besnik Rraci dhe Sadik Krasniqi,

I nderuari ambasador i Republikës së Shqipërisë, z. Ermal Dredha

Të nderuar të pranishëm,

Kam nderin e veçantë që, në emër të SHBK “Salih Çekaj” në Zvicër, t’ju përshëndes përzemërsisht dhe t’ju falënderoj sinqerisht për pjesëmarrjen tuaj në hapjen e kësaj ekspozite, kushtuar njërit ndër figurat më të shquara të lëvizjes sonë për liri dhe pavarësi – prof. Fehmi Aganit.

Kjo ekspozitë, së bashku me katalogun shoqërues, është e treta me radhë, pas atyre kushtuar presidentit Rugova dhe komandantit Salih Çekaj.

Me të, përmbyllet një kapitull i rëndësishëm i historikut të veprimtarisë së këtij trinomi të jashtëzakonshëm, i cili në vetëdijen kombëtare njihet si filozofia politike e quajtur RUGOVIZËM.

Ekspozita e parë solli para nesh politikën e jashtme, diplomacinë dhe organizimin politik të brendshëm që udhëhoqi presidenti Rugova.

E dyta pasqyroi rezistencën e armatosur, aksionet guerile dhe luftën e hapur në Kosovë përmes figurës qendrore të komandant Salih Çekaj.

Ndërsa kjo e sotmja e plotëson këtë mozaik, duke paraqitur koordinimin e këtyre dy shtyllave – një koordinim që në mënyrën më të përkryer e mishëroi inteligjenca e rrallë politike e prof. Fehmi Aganit.

Sot, para nesh qëndron e plotë tabloja e këtij trinomi të famshëm. Një filozofi politike që përfshin gjithçka: politikë dhe diplomaci, rezistencë aktive dhe të armatosur, aksione guerile, shtetformim e shtetndërtim në kushte okupimi, si dhe luftën e hapur për liri. Kjo nuk ishte rastësi – ishte vizion, ishte strategji, ishte edhe një lloj profecie historike që udhëhoqi popullin shqiptar drejt fitores në rrethana tejet të vështira.

Pikërisht kjo tërësi e bën të merituar emërtimin RUGOVIZËM – një filozofi politike që solli lirinë dhe pavarësinë e Republikës së Kosovës. Këto tri ekspozita, të shoqëruara me katalogë, hedhin poshtë në mënyrë të qartë çdo propagandë që e ka paraqitur Rugovën në mënyrë të njëanshme, si thjesht paqësor dhe kundër luftës.

Shumë studiues kanë shkruar për Rugovën, por rrallëkush ka pasur guximin të trajtojë tërësinë e kësaj filozofie – përfshirë edhe rezistencën e armatosur dhe luftën çlirimtare si pjesë të pandashme të saj. Është hera e parë që kjo tablo paraqitet e plotë, falë punës së palodhur të Besnikut dhe Sadikut.

I përgëzoj dhe i falënderoj nga zemra për guximin intelektual, përkushtimin dhe korrektësinë, si dhe për bashkëpunimin e sinqertë me SHBK “Salih Çekaj” në Zvicër. Po ashtu, shfrytëzoj këtë rast që, në emër të kryesisë, të shpreh mirënjohjen time dhe falëmnderimin për konsullin e Republikës së Kosovës në Cyrih, z. Vigan Berisha, dhe bashkëpunëtorët e tij, për gatishmërinë dhe përkushtimin në realizimin e kësaj ekspozite, si dhe për bashkëpunimin korrekt dhe të vazhdueshëm me shoqatën Salih Çekaj në Zvicër.

Lavdi veprës kolosale të prof. Fehmi Aganit!

Fehmi Agani na bashkon!

Mbrëmë, më 09.05.2026, në Zürich u bë hapja e Ekspozitës Tematike-Muzeore me titull: “Kontributi Atdhetar, Intelektual dhe Politik i Akademik Fehmi Agani”, me autorë Besnik Rracaj dhe Sadik Krasniqi.

Organizimin e këtij eventi e bënë: Konsullata e Republikës së Kosovës në Zürich, në krye me konsullin Vigan Berisha, SHBK “Salih Çekaj” në Zvicër dhe Muzeu Kombëtar i Kosovës, me përfaqësuesit Besnik Rracaj dhe Sadik Krasniqi.

Me fjalimet e tyre përmbajtësore mbi veprën madhore të prof. Fehmi Agani folën: Donika Gërvalla-zëvedskryeministre dhe ministre e drejtësis së Republikës së Kosovës, Mentor Latifi- abasador në Bern dhe Saim Tahiraj-kryetarë i shbk“ Salih Çekaj“ në Zvicër

Me pjesëmarrjen e tyre në këtë event e nderuan edhe: Shukrie Ramadani-zëvendëambasadore në Bern,njëherësh bashkëshortja e Agim Ramadani, ish-ministri i Mbrojtjes së Republikës së Kosovës Nik Gjeloshi, si dhe oficerë të ish-Ministrisë së Mbrojtjes: Jahir Maleta, Zymer Tahiraj, Bajram Mehmetaj, Islam Sadiku dhe të tjerë.

Të pranishëm ishin edhe bashkëpunëtorë dhe veprimtarë të prof. Fehmi Agani, si: Jusuf Demaj, Ismet Krasniqi, Hasan Spahiu, Skender Tolaj dhe shumë të tjerë.

Në këtë event morën pjesë edhe shumë veprimtarë të Lidhja Demokratike e Kosovës me nëndegët e tyre, si ato në Olten, Burgdorf, Zürich dhe disa të tjera. Gjithashtu, e pranishme ishte edhe kryesia e Shoqatës Humanitare “Nëna Terezë”, në krye me Nue Zalli, si dhe përfaqësues nga Shoqata “Shari”.

Nën moderimin e shkëlqyer të Qamil Çekaj, çdo gjë shkoi në mënyrë të përkryer, për çka e përgëzojmë dhe e falënderojmë sinqerisht.

Në emër të kryesisë së SHBK “Salih Çekaj” në Zvicër, falënderojmë nga zemra:

* Vigan Berisha për përkushtimin dhe bashkëpunimin në organizimin e këtij eventi, si dhe për bashkëpunimin e vazhdueshëm me SHBK “Salih Çekaj”;

* Besnik Rracaj dhe Sadik Krasniqi për punën e madhe dhe të guximshme në realizimin e kësaj ekspozite, si dhe të dy ekspozitave paraprake për presidentin Ibrahim Rugova dhe komandant Salih Çekaj;

* Të gjithë bashkatdhetarët që ndihmuan financiarisht në realizimin e kësaj ekspozite.

Me shumë nderime,

Kryesia e SHBK “Salih Çekaj” në Zvicër.