Maskat Heqin Flamurin e Izraelit, Reagon Ministria e Jashtme
Sipas deklaratës së Ministrisë së Punëve të Jashtme të Shqipërisë, disa persona të maskuar gjatë protestës së zhvilluar në Tiranë kanë hequr flamurin e Izraelit nga ambientet e ambasadës. Ky është një veprim i papranueshëm që cenon normat diplomatike dhe bie ndesh me traditën shqiptare të mikpritjes, respektit dhe nderit.
Protesta është një e drejtë demokratike e çdo qytetari, por aktet e dhunshme dhe provokuese nuk mund të justifikohen në asnjë mënyrë. Sulmi ndaj simboleve të një ambasade nuk i shërben as kauzës së protestuesve dhe as interesit të Shqipërisë.
Ky veprim ngre shqetësime serioze dhe lë hapur pyetjen se kush fshihet pas këtyre provokimeve që po tentojnë ta devijojnë karakterin paqësor të protestave. Institucionet duhet të zbardhin plotësisht ngjarjen dhe të mbajnë përgjegjës autorët.
Respektimi i ligjit, i institucioneve dhe i normave diplomatike është në interes të çdo shoqërie demokratike. 
