RTK, ndaleni keqinformimin: Kosova nuk ka “Myfti të Kosovës”!
Është e papranueshme që Radio Televizioni i Kosovës, në edicionin qendror të lajmeve të orës 19:30, ta prezantojë Naim Tërnavën si “Myfti i Kosovës”.
Ky është një cilësim i pasaktë dhe keqinformues.
Kosova nuk ka pozitë shtetërore apo institucionale të quajtur “Myfti i Kosovës”. Naim Tërnava është kryetar i Bashkësisë Islame të Kosovës (BIK). Brenda strukturave të veta fetare, BIK-u mund të përdorë tituj dhe emërtime që i përcakton vetë, por ato nuk janë tituj të Republikës së Kosovës dhe nuk përfaqësojnë shtetin.
RTK, si transmetues publik, ka detyrim të veçantë për saktësi, paanshmëri dhe përgjegjësi në informim. Nuk mund të krijojë përshtypjen se një udhëheqës i një komuniteti fetar është një lloj autoriteti fetar i Republikës së Kosovës.
Kosova është shtet laik. Kushtetuta e Republikës së Kosovës përcakton qartë karakterin laik të shtetit. Institucionet publike udhëhiqen nga Kushtetuta dhe ligjet e Republikës së Kosovës, jo nga normat, hierarkitë apo titujt e institucioneve fetare.
Prandaj kërkojmë nga RTK:
* të korrigjojë publikisht këtë cilësim të pasaktë;
* të përdorë në raportimet e veta titullin institucional të saktë: Kryetar i Bashkësisë Islame të Kosovës;
* të mos u japë titujve të institucioneve fetare karakter shtetëror që nuk e kanë;
* të respektojë parimin e laicitetit dhe kuadrin kushtetues të Republikës së Kosovës.
Kosova nuk ka Myfti të Kosovës. Ka komunitete fetare dhe udhëheqës të tyre. Shteti ka institucione të përcaktuara me Kushtetutë dhe ligj.
RTK duhet ta dijë këtë më mirë se kushdo tjetër.
Organizata “Shqiptaria”
