REAGIM PUBLIK
Pamjet ku pjesëtarë të Policisë së Republikës së Kosovës, të veshur me uniformën zyrtare, bartin një arkivol të mbuluar me flamur fetar islamik janë thellësisht shqetësuese dhe të papranueshme nga këndvështrimi kushtetues, institucional dhe shtetëror.
Republika e Kosovës është shtet laik. Kushtetuta garanton ndarjen e shtetit nga feja dhe neutralitetin e institucioneve publike. Kosova nuk është shtet islamik dhe nuk udhëhiqet nga sistemi sheriatik, por është republikë parlamentare demokratike, e ndërtuar mbi sundimin e ligjit dhe orientimin e saj euroatlantik. Për këtë arsye, Policia e Kosovës ka detyrim të respektojë vetëm Kushtetutën dhe ligjet e Republikës.
Uniforma zyrtare përfaqëson shtetin, jo një fe apo ideologji. Përdorimi i saj në rrethana që krijojnë identifikim të institucionit me simbole fetare cenon neutralitetin institucional, dëmton karakterin laik të shtetit dhe rrezikon besimin e qytetarëve në paanshmërinë e institucioneve.
Po aq shqetësues është fakti se raste të ngjashme kanë ndodhur edhe më parë, kur pjesëtarë të Policisë së Kosovës, me uniformë zyrtare, kanë marrë pjesë në rite fetare islame, pa u bërë publik asnjë veprim disiplinor ndaj tyre. Mosveprimi institucional rrezikon të krijojë një praktikë që bie ndesh me rendin kushtetues dhe orientimin demokratik të Republikës së Kosovës.
Për këtë arsye, kërkoj nga Inspektorati Policor i Kosovës dhe autoritetet kompetente që ta hetojnë këtë rast, të identifikojnë përgjegjësit dhe të ndërmarrin masa disiplinore ndaj çdo polici që, gjatë ushtrimit të detyrës ose me uniformë zyrtare, cenon parimin e laicitetit dhe neutralitetit institucional. Raste të tilla duhet të dokumentohen dhe të trajtohen me seriozitet, në mënyrë që të mos krijohen precedentë të rrezikshëm për rendin kushtetues.
Ruajtja e shtetit laik nuk është çështje preference, por detyrim kushtetues. Mbrojtja e Kushtetutës, e karakterit laik të Republikës dhe e orientimit euroatlantik të Kosovës është përgjegjësi e çdo institucioni shtetëror, e në veçanti e Policisë së Kosovës.
24.07.2026
Blerim Nika
