Bahri Cani, gazetar
Gjykata Themelore në Lipjan ka caktuar nga një muaj paraburgim për pesë zyrtarë policorë të dyshuar për përfshirje në vdekjen e Agon Zejnullahut.
“Gjykata Themelore në Prishtinë, Dega në Lipjan – Departamenti i Përgjithshëm Penal ka aprovuar kërkesën e Prokurorisë Themelore në Prishtinë duke caktuar masën e paraburgimit në çështjen penale ndaj të pandehurve E.B., L.RR., A.K., A.R. dhe I.N., në kohëzgjatje prej një muaji për secilin, për shkak të dyshimit të bazuar se kanë kryer veprën penale Vrasje nga pakujdesia.”
Mbrëmë dhe sot gjatë gjithë ditës ka pasur reagime të shumta, prej presidentes Osmani, kryeministrit në detyrë Kurti e deri tek partitë politike. Të gjithë ata, sikur edhe mediat dhe analistët kanë interpretimet e tyre.
Nëse doni mund të komentoni dhe interpretoni edhe ju, por faktet janë këto: Agon Zejnullahu, 27 vjeç, ka ndërruar jetë gjatë ndërhyrjes me rastin e arrestimit të tij.
Gjykata konsideron se të pandehurit E.B., L.RR., A.K., A.R. dhe I.N. dyshohen se me datë 07.07.2025, rreth orës 00:10, në rrugën “Hajredin Bajrami” në Lipjan duke vepruar në bashkëkryerje nga pakujdesia kanë privuar nga jeta, tani të ndjerin A.Z.”
Emrat dhe fotografitë e personave të paraburgosur dhe dyshuar janë publikuar gjithandej, ndaj po i publikoj edhe unë: Prokuroria paraqiti kërkesë për paraburgim ndaj rreshterit Ibrahim Nela dhe katër zyrtarëve të tjerë: Albian Ratkoceri, Artidon Konxheli, Liridon Rrahmani dhe Endrit Beqiri.
Ata dyshohen për veprën penale “vrasje nga pakujdesia” në rrethana të bashkëkryerjes”.
