(Ish-Radio Prishtina, e pushtuar nga Serbia më 5 korrik 1990.
Kjo ndërtesë mbetet dëshmi e mbylljes së dhunshme të zërit të Kosovës
dhe e qëndresës së gazetarëve, nëpunësve dhe punëtorëve
të Radio Televizionit të Prishtinës.)
Në shkallët e pallatit,
njerëz harbutë
e kokëboshë,
me kallashë në duar,
ruajnë një të shitur
që thërret
për nënshtrim.
Nga mikrofonat
vjen
zë qyqesh
i përzier
me zë korbash.
Nga jashtë,
populli thërret:
“Duam zërin
e bijve
dhe bijave
të Dardanisë,
e jo të qyqeve
dhe korbave
të Shumadisë.”
Vuajtje
sa të Jezu Krishtit
në Judë,
por ecje
me këmbë të shëndosha
e fytyrën e ndritur
kah Perëndimi
e Atlantiku,
për ditë shprese
e ditë të bardha.
Gazetarë,
nëpunës
e punëtorë
të Radio Televizionit
të Prishtinës,
lajmëtarë
të lirisë
së Kosovës.
Farkuar
si hekuri
në zjarr,
qofshi
jetë e mot
faqebardhë!
Arif Ejupi, Gjenevë
Më 5 korrik 2000
P.S.
Autori i këtyre rreshtave, gjatë atyre viteve të rënda, ishte gazetar i kësaj dritareje të njohur informimi në Kosovë e në botë. Ai u dëbua më 5 korrik 1990 nga vendi i punës, së bashku me qindra kolegë.
Edhe pse më 14 mars 1994 u keqtrajtua rëndë nga policia serbe, për shkak se denonconte dhunën dhe terrorin serb mbi popullin shqiptar në mediet vendore dhe ndërkombëtare, z. Ejupi asnjë çast nuk hoqi dorë nga profesioni i tij.
Nëpërmjet qindra dokumentarëve, shkrimeve dhe ekspozitave, në cilësinë e anëtarit të KMDLNJ-së, ai dëshmoi kudo dhunën dhe gjenocidin serb ndaj shqiptarëve të pambrojtur të Kosovës.
Z. Arif Ejupi si aktivist i hershëm i KMDLNJ, nuk është kursyer për asnjë moment që krimin dhe gjenocidin serb ta paraqesë me fakte dhe të argumentuar para opinionit ndërkombëtar. Në mënyrë që lexuesita ketë të qartë punën e tij korrekte po u ofrojmë edhe linkun në vazhdim : https://pashtriku.org/e-verteta-e-fotografise-se-z-ali-murat-murati-nga-llapashtica-e-poshtme/ Me respekt, Valmiri ish- refugjat në Zvicrën gjermane.