Sot në Zogaj të Vushtrrisë, të shohësh flamujt e UÇK-së dhe flamujt kombëtarë të përdoren në një protestë kundër ndërtimit të një kishe katolike shqiptare është një pamje që duhet të na shqetësojë të gjithëve.
Për çfarë luftuam ne? A luftuan dëshmorët e UÇK-së që shqiptarët të pengojnë njëri-tjetrin të ndërtojnë objektet e tyre të kultit? A luftuam për një Kosovë ku një shqiptar katolik duhet të ndihet i huaj në vendin e vet?
Flamuri i UÇK-së është simbol i sakrificës për liri, dinjitet dhe të drejta, jo simbol për përçarje fetare. Ai nuk duhet të përdoret si mburojë për protesta që mund të nxisin armiqësi ndaj shqiptarëve të një besimi tjetër.
Kushdo që përdor simbolet kombëtare duhet ta kuptojë se Shqiptaria nuk është pronë e asnjë feje. Katoliku, myslimani, ortodoksi dhe shqiptari që nuk beson janë qytetarë të barabartë.
Prandaj, ajo që po shohim sot është një turp për ata talebanë shqipfolës që duan ta shndërrojnë identitetin kombëtar në instrument për luftë fetare.
Mos e përdorni UÇK-në për të na ndarë!
Mos e përdorni flamurin kombëtar kundër shqiptarëve!
Kosova duhet të jetë shtet i lirë, demokratik dhe laik, ku askush nuk frikësohet nga besimi i tjetrit.
Për këtë liri është derdhur gjak. Për këtë duhet ta ruajmë paqen.
