Luan Dibrani, Durrës
Dalëngadalë po del në pah një skenar i rrezikshëm pas zhurmës kundër Vlorës, Sazanit dhe investimeve amerikane.
Këtu nuk është vetëm halli për natyrën, pronën apo transparencën. Këto janë çështje serioze dhe duhen mbrojtur me ligj. Por pas kësaj zhurme po shfaqet edhe një bosht propagandistik anti-amerikan, anti-izraelit dhe anti-perëndimor.
Në këtë bosht po duken qartë përputhje interesash mes islamizmit politik, hoxhallarëve politikë, qarqeve nacionaliste greke dhe propagandës serbe.
Nuk është nevoja që të jenë të ulur në një tavolinë për të punuar në të njëjtin drejtim. Mjafton që të kenë të njëjtin objektiv: ta dobësojnë orientimin euro-amerikan të shqiptarëve dhe ta paraqesin zhvillimin perëndimor si rrezik për kombin.
Pse u zgjuan pikërisht tani këta zëra?
Pse sa herë përmendet Amerika, Izraeli, investimi perëndimor dhe zhvillimi i Vlorës, menjëherë hidhen parulla fetare, anti-izraelite dhe anti-amerikane? Kush përfiton nëse Shqipëria tremb investitorët amerikanë?
Kush përfiton nëse Vlora kthehet nga simbol zhvillimi në arenë përçarjeje? Kush përfiton nëse shqiptarët largohen nga boshti euro-atlantik?
Protestuesi i ndershëm që mbron pronën, natyrën dhe transparencën meriton respekt. Por kush e kthen këtë çështje në luftë kundër Amerikës, kundër Izraelit dhe kundër zhvillimit perëndimor, nuk po mbron Vlorën — po e përdor Vlorën.
Vlora nuk është pronë e islamizmit politik. Vlora nuk është lodër e agjendave greke apo serbe. Vlora nuk është tribunë e propagandës anti-perëndimore.
Vlora është tokë shqiptare. Zhvillim po. Transparencë po. Amerikë po. Korrupsion jo. Propagandë jo. Izolim jo. Agjenda të huaja kundër interesit shqiptar — kurrë.
