Uk Lushi, ish luftëtar i UÇK-së së Batalionit Atlantiku, SHBA
____
Sot, Albin Kurti, siç kam thënë për çdo lider shqiptar që nderon çlirimtarët e rënë të UÇK-së, nderoi veten duke nderuar kujtimin dhe jetët e prera të vëllezërve heronj shqiptaro-amerikanë Bytyçi— Agronin, Mehmetin dhe Yllin.
Kryeministri në detyrë Kurti na kërkoi luftëtarëve të Batalionit “Atlantiku” të ishim bashkë me të dhe familjen Bytyçi në homazhin për tre heronjët shqiptaro-amerikanë dhe ne u përgjigjëm, si për çdo lider shqiptar, me miratim mirënjohës.
Në fjalën që e bëra në emër të “Atlantikut” lexova epitafet kuptimplote në gurët e varreve të tre vëllezërve Bytyçi dhe rikujtova z. Kurti dhe të pranishmit se shqiptarët gjithmonë duhet të gjejmë zgjidhje që vendosë interesin nacional mbi çdo gjë tjetër, pavarësisht dallimeve apo mospajtimeve demokratike me njëri-tjetrin, ashtu si kemi bërë para, gjatë dhe pas luftës çlirimtare dhe duhet të bëjmë edhe sot.
Uk Lushi me Albin Kurtin
Veprat e jashtëzakonshme të vëllezërve Bytyçi dhe heronjëve shqiptarë ndër breza duke sakrifikuar jetët e tyre duhet të jenë mesazhi përbashkues që zhbën ndasitë partiake, diferencat ideologjike dhe polarizimin toksik.
Lavdi Agronit, Mehmetit dhe Yllit! 
