Të dashur miq, kolegë, studentë dhe bashkëpunëtorë,
Me një emocion të veçantë dhe me shumë kënaqësi dua ta ndaj me ju një lajm që për mua ka rëndësi të jashtëzakonshme profesionale, akademike dhe njerëzore.
Sapo kam pranuar konfirmimin zyrtar nga Universiteti i Evropës Juglindore me seli në Tetovë, se jam pranuar në ciklin e tretë të studimeve – Doktoraturë në Media dhe Komunikim.
Ky është një moment që e kam pritur gjatë. Për mua, kjo nuk është thjesht një pranim në një program të doktoratës. Është një pikë e rëndësishme në rrugëtimin tim më shumë se tri dekadësh në gazetari, komunikim, kërkim shkencor dhe edukim universitar.
Ky moment vjen pas një pune të gjatë, të vazhdueshme dhe kërkuese në fushën e gazetarisë, veçanërisht në gazetarinë hulumtuese, etikën mediatike, komunikimin dhe studimet mbi mediat.
Është rezultat i një rrugëtimi ku përvoja profesionale në terren është ndërthurur vazhdimisht me kërkimin akademik, shkrimin, botimin dhe përpjekjen për ta parë gazetarinë jo vetëm si profesion, por edhe si përgjegjësi shoqërore dhe disiplinë shkencore.
Për kontributin tim në gazetari, veçanërisht në gazetarinë hulumtuese, jam vlerësuar me katër çmime për gazetari hulumtuese në Kosovë, në vitet 2003, 2006, 2007 dhe 2008, nga juri të ndryshme profesionale.
Këto vlerësime kanë qenë për mua jo vetëm mirënjohje për punën e bërë, por edhe një shtysë për të vazhduar kërkimin, verifikimin e fakteve dhe përpjekjen për ta mbajtur gazetarinë sa më pranë standardeve profesionale dhe etike.
Për më shumë se tri dekada, gazetaria ka qenë pjesë thelbësore e jetës sime. Nga fillimet në mediat e shkruara në vitet ’90, përvoja si redaktor dhe kryeredaktor, angazhimi në gazetarinë e përditshme, korrespondenca nga Gjilani, themelimi i Klubit të Gazetarëve “Beqir Musliu”, moderimi i qindra debateve e tryezave, e deri te themelimi dhe drejtimi i Agjencisë Rajonale të Lajmeve “Rajonipress”, secila periudhë ka lënë gjurmën e vet në formimin tim profesional.
Njëkohësisht, rrugëtimi im akademik më ka dhënë mundësinë që përvojën e gazetarisë ta analizoj përmes kërkimit shkencor dhe ta ndaj me gjeneratat e reja të gazetarëve dhe profesionistëve të komunikimit.
Që nga viti 2011, si ligjërues në fushën e Medias dhe Komunikimit në UBT, kam pasur privilegjin të punoj me studentë dhe të ligjëroj në fusha si Zhanret e Gazetarisë, Teknikat e Raportimit, E Drejta dhe Etika Mediatike dhe Gazetaria Online.
Gjatë kësaj periudhe kam prezantuar dhe botuar punime shkencore në konferenca dhe revista akademike, duke u marrë me tema që lidhen me etikën në media, vetërregullimin, gazetarinë online, raportimin në situata të ndjeshme, dezinformimin dhe sfidat bashkëkohore të gazetarisë.
Po ashtu, kam botuar disa libra dhe tekste universitare, ndër të cilat “Vrasja e drejtësisë në Kosovë”, “Vrasje dhe dëshmi”, “Mediet, etika, raportimet për situatat e ndjeshme, hetimet dhe nocionet juridike në gazetari”, “Gazetaria online në Kosovë dhe rajon, etika dhe sfidat e vetërregullimit”, “Etika, mburojë e gazetarisë profesionale”, si dhe botimin më të ri “Gazetaria hulumtuese: Misioni, rreziqet, etika dhe sfidat profesionale”.
Pranimi në doktoraturë, për mua, është rrjedhim i natyrshëm i këtij rrugëtimi, por njëkohësisht edhe fillimi i një etape të re. Tashmë përballë meje qëndron një sfidë tjetër: ta shndërroj përvojën shumëvjeçare profesionale në kërkim shkencor edhe më të thelluar dhe të kontribuoj me njohuri të reja në fushën e medias dhe komunikimit.
Besoj se gazetaria e sotme ka nevojë më shumë se kurrë për hulumtim serioz, integritet profesional, standarde etike, mendim kritik dhe qasje shkencore. Prandaj, këtë rrugëtim të ri akademik e shoh edhe si një mundësi për të eksploruar më thellë problemet, transformimet dhe sfidat me të cilat përballet gazetaria bashkëkohore.
Dua t’i falënderoj nga zemra të gjithë ata që kanë qenë pjesë e rrugëtimit tim profesional dhe akademik: kolegët, studentët, gazetarët, bashkëpunëtorët, miqtë dhe familjen time.
Çdo këshillë, bashkëpunim, debat, kritikë, përkrahje dhe përvojë e përbashkët ka qenë pjesë e këtij rrugëtimi.
Sot, me shumë përulësi dhe përgjegjësi, hap një kapitull të ri.
Doktoratura nuk është fundi i një rrugëtimi, por fillimi i një përgjegjësie edhe më të madhe për të kërkuar, hulumtuar, argumentuar dhe kontribuar në zhvillimin e dijes në fushën e medias dhe komunikimit.
Faleminderit të gjithëve që kanë besuar në punën time dhe kanë qenë pjesë e këtij rrugëtimi.
Me respekt dhe mirënjohje./m/s/
Musa Sabedini me mikun e kolegun e tij të hershë, Bajram Kabashin, në një restorant të Prishtinës në verën e vitit 2025, duke ia dhuruar librin e tij për Gazetarinë Huumtuese.
