KOMUNIKATË PËR MEDIA – ORGANIZATA SHQIPTARIA
____
Organizata Shqiptaria e dënon publikisht veprimin e deputetit Eman Rrahmani për ndryshimin e formulës zyrtare të betimit në Kuvendin e Republikës së Kosovës. Ky nuk është akt simbolik dhe as devijim procedural i parëndësishëm. Është ndërhyrje në një akt kushtetues dhe përpjekje për ta zëvendësuar obligimin shtetëror me referencë fetare.
Betimi i deputetit nuk është deklaratë personale. Është kusht juridik për hyrjen në funksion publik. Teksti i tij është i përcaktuar në mënyrë të detyrueshme nga rendi kushtetues dhe Rregullorja e Kuvendit dhe nuk lejon asnjë shtesë apo modifikim. Shtesa “në ZOT” nuk ekziston në formulën zyrtare dhe, për rrjedhojë, betimi është dhënë në formë jo-valide.
Kushtetuta e Republikës së Kosovës, neni 8, e përcakton qartë Kosovën si shtet laik dhe neutral në çështjet e besimit. Kjo nënkupton se institucionet publike nuk identifikohen me asnjë besim dhe funksionet shtetërore ushtrohen vetëm në emër të Republikës dhe të ligjit. Deputeti, në momentin e betimit, nuk përfaqëson bindjen e tij private, por autoritetin publik. Transformimi i një akti shtetëror në deklaratë religjioze cenon neutralitetin institucional të shtetit.
Nga pikëpamja juridike pasojat janë të qarta:
• betimi i ndryshuar konsiderohet betim jo-valid;
• pa betim valid mandati nuk aktivizohet ligjërisht;
• çdo ushtrim funksioni mbi bazën e një betimi të tillë është juridikisht i kontestueshëm.
Ky veprim përbën precedent të rrezikshëm: nëse formula e betimit personalizohet, rendi kushtetues relativizohet dhe funksioni publik vendoset mbi bindje individuale. Shteti juridik nuk funksionon mbi interpretim privat të normës.
Organizata Shqiptaria e konsideron këtë veprim si tentativë për futjen e elementeve të fesë në aktin formal të shtetit dhe kërkon reagim të menjëhershëm institucional.
Ne i kërkojmë Kryetares së Kuvendit:
1. Të konstatojë pavlefshmërinë e betimit.
2. Të obligojë deputetin ta përsërisë betimin sipas formulës kushtetuese, pa asnjë shtesë.
3. Në rast refuzimi, të nisë procedurën për ndërprerjen e mandatit.
Nëse Kuvendi nuk vepron, Organizata Shqiptaria do të iniciojë procedura pranë Gjykatës Kushtetuese dhe çdo mekanizmi tjetër ligjor deri në përfundimin e mandatit të deputetit.
Republika e Kosovës qeveriset nga Kushtetuta dhe ligji.
Funksioni publik nuk betohet mbi besim, por mbi rend juridik.
Pa betim kushtetues të vlefshëm nuk ka mandat të vlefshëm.
