Florim Zeqa
Forcën e veprimit e gjejë tek dashuria e pafundme për vendin tim, e gjejë tek njerëzit e ndershëm dhe atdhetarë, tek njerëzit e sinqertë që punojnë pa ndalur për të mirën e vendit dhe qytetarëve.
I gatshëm për sfidën e madhe
Forcën dhe inspirimin gjithmonë e kam pasur dhe e kam tek idealistët dhe veprimtarët e mëhershëm, në veçanti tek ata të viteve të ’90-ta, të cilët kanë punuar ditë e natë pa llogaritur në asgjë personale, duke menduar gjithnjë për të mirën e përbashkët, duke punuar për të ardhmen e shtetit, të gatshëm për të sakrifikuar deri në vetëflijim për lirinë e vendit.
Andaj, edhe sot, 27 vjet nga çlirimi dhe 18 vjet nga pavarësimi i vendit jam i gatëshëm që përseri të vihem në shërbim të vendit dhe qytetarëve.
Pavarësisht pozicionit, kudo që ndodhem gjithmonë mendjen e mbajë tek atdheu im, tek vendlinjda ime, aty ku kam lindur dhe jam rritur, aty ku i kam mësuar ninullat e para.
Mendoj dhe shpresoj fuqishëm që një ditë të kthehem të kontribuoj edhe fizikisht, që idetë e mia t’i materializoj në shërbim të qytetarëve dhe vendit tim të shenjt.
Jam i gatshëm që të kthehem në vendlindje kurdo që të më thërret atdheu, përkatësisht qytetarët e vendit tim, do të riatdhesohem për t’u bërë pjesë aktive e politik-bërjes, gjegjësisht e garës zgjedhore.
Jam i gatshëm t’i sfidojë të gjitha partitë dhe liderët partiakë pa dallim, përfshirë edhe Kryeministrin aktual, personin më të votuar në zgjedhjet parlamentare në Kosovën e pasluftës, z. Albin Kurti.
Të mos flasim për liderët e vegjël të partive opozitare, të cilët e kanë humbur besimin dhe kredibilitetin tek qytetarët.
Në këto rrethana, secili qytetarë i vendit që e merrë guximin dhe ju kundërvihet do të delë fitimtarë përballë tyre.
Këto nuk janë fjalë sa për t’ua bërë qejfin, as për t’iu shitur mend që jam dikushi, por zotohem përpara Juve dhe para Zotit se do të bëjë më shumë dhe më mirë sesa gjithë të tjerët deri më tani!
Ju garantoj se do ta bëjë një kthesë epokale në politik-bërjen kosovare, do ta përmirësoj imazhin e shtetit para qytetarëve dhe bashkësisë ndërkombëtare.
Qytetarë të dashur të vendit tim, ju garantoj dhe do ta ndryshoj komplet mentalitetin qeverisës në vend, që i bie se, nga mentaliteti i marrjes gjithçka nga shteti do ta kthejë në mentalitet për dhënjen gjithçka për shtetin dhe qytetarët!
Unë do të jepi gjithçka për shtetin ashtu siq dhamë gjatë viteve të rezistencës paqesore dhe luftës çlirimtare, kur garonim se cili po jepim më shumë për shtetin.
Shpresë dhe besim për një të nesërme më të mirë
Forca e ndryshimit në vendin tonë jeni Ju qytetarë të vendit tim!
Forca e ndryshimit dhe e shpresës jeni Ju bashkatdhetarë në botën mbarë, Ju që asnjëherë nuk ia kthyet shpinën atdheut, por edhe në kohët më të vështira iu qëndruat pranë qytetarëve.
Ju bashkatdhetarë e ndihmuat Kosovën në kohën më të rëndë të okupimit klasik të Serbisë, duke e mbajtur gjallë arsimin shqip, shëndetësinë, e mbi të gjitha shpresën për jetë në Kosovë.
Ju të dashur bashkatdhetarë e financuat dhe e ndihmuat materialisht edhe fizikisht duke u bërë pjesë aktive e luftës çlirimtare.
Ju bashkatdhetarë e ndërtuat dhe rindërtuat Kosovën e shkatërruar nga gërmadhat e luftës!
Tashmë ka ardhur koha, që të bashkohemi edhe një herë për Kosovën në Alternativën Demokratike për Ndryshim (ADN), për t’ua kthyer shpresën e humbur qytetarëve nga këto parti të dështuara dhe këta politikanë të tejëkonsumuar që mendojnë vetëm për xhepat e tyre e jo për mirëqenjen e qytetarëve!
Politikanët e deritanishëm asnjëherë nuk menduan për njerëzit që kanë nevojë, për qytetarët me gjëndje të rënduar socio-ekonomike e aq më pak për të sëmurët që shërimin e kërkojnë jashtë vendit, ngase shteti nuk arriti për 27 vite të krijojë as një bazë të sigurimeve shëndetësore!
“Zori të çon në derë të hasmit” (popullore)!
E vërtetë na doli të jetë kjo thënje trishtuese, ngase shumë nga qytetarët e vendit tonë shërim kërkuan dhe po kërkojnë në shtetin e Serbisë, dhe e gjejnë atë të cilën shteti për të cilin dhanë shumë dhe sakrifikuan i la në mëshirë të fatit!
Kjo është Kosova që vetëm armiqt e saj e kanë dëshiruar, e cila dita-ditës po zbrazet dhe po shkretnohet nga politikanët e saj!
Zoti e ruajt dhe bekoftë Republikën e Kosovës!
Zoti i bekoftë me mendjekthjellësi qytetarët e saj!
Zoti i ruajt mërgimtarët kudo që janë, që e ndanë kafshatën e familjeve të tyre për çlirimin e trojeve tona etnike.
P.S: Ky shkrim për më tepër se mesazh, është demonstrim i pa anësisë partiake në zgjedhjet e 7 qershorit.
