Shqiptar Shaljani, Shalë e Bajgores, Mitrovicë
(Ahmet Musa)
Sot, bashkë me Aleksandrin dhe Isakun, bëmë një eksplorim në Veri të Kosovës. Është mahnitëse të shohësh këtë pjesë të vendit tonë, të pasur me resurse të jashtëzakonshme minerare e ujore. Por, këto pasuri të çmuara kanë qenë edhe mallkimi ynë – Serbia kurrë nuk hoqi dorë nga to, i mbajti deri vonë, duke u përballur me çdo mjet për t’i mbajtur nën kontroll.
Erdhi një ditë kur Serbia u përball ballë për ballë me policinë e Kosovës, e mbi të gjitha me guximin e Afrim Bunjakut dhe kolegëve të tij. Aty, në vijën e mbrojtjes, Afrimi dha jetën, i vrarë nga paramilitarët serbë. Ai ra, por nuk u shua. Emri i tij është i përjetësuar në rrugën qendrore të Bajskës, dhe kujtimi i tij frymëzon çdo polic, çdo qytetar, çdo shqiptar.
Atje patëm rastin të takohemi me pjesëtarë të Njësisë Speciale të Policisë së Kosovës, të cilët me krenari ruajnë sigurinë e qytetarëve dhe mbrojnë rendin e atdheut.
Zemra na u mbush me krenari kur i dëgjuam të thonë: “Ne jemi krenarë që kemi pasur koleg Afrim Bunjakun!”
Afrimi nuk ka vdekur – ai jeton në frymën e rezistencës, në mbrojtjen e atdheut, në krenarinë tonë kombëtare.
Lavdi heroit Afrim Bunjaku!
