____
RIKTHIMI TE RRËNJËT NUK ËSHTË PËRÇARJE !
Një përgjigje për «Zërin e Vushtrrisë» dhe portaleve të territ
____
Së pari, mirënjohje e përzemërt për të gjithë shqiptarët e vullnetit të mirë, e veçmas për miket e miqtë që, gjatë këtyre dy viteve, më kanë mbështetur mua dhe aktivistët e rikthimit moralisht e shpirtërisht.
Sipas informacioneve të përcjella nga persona të përfshirë drejtpërdrejt në këtë veprimtari, rreth 40 mijë shqiptarë në Kosovë janë rikthyer te besimi i të parëve, pa përfshirë mërgatën. Kjo shifër nuk është statistikë zyrtare publike, por një vlerësim i përcjellë nga burime të përfshira në këtë proces. Është një zhvillim që meriton të trajtohet me seriozitet, jo të mbulohet me paragjykime.
Pagëzimi djeshëm i një grupi nga bija e bijë të këtij kombi , në Zogaj të Shalës së Bajgorës, në komunën e Vushtrrisë, pikërisht në vendin ku u bekua guri i themelit të kishës së ardhshme, është pjesë e këtij rrugëtimi , ka nxitur reagime të shumta e në disa raste edhe të çuditëshme !
Portali «Zëri i Vushtrrisë» e pagëzoi ngjarjen me një titull tjetër: «Rikthimi te nxitja e përçarjes».
Vërtetë ?
Ku qëndron përçarja kur shqiptarët, me vullnet të lirë, zgjedhin besimin e tyre dhe kërkojnë të ruajnë trashëgiminë historike? Nëse ka shkelje ligjore, le të paraqiten faktet. Por liria e ndërgjegjes nuk është faj, pagëzimi nuk është provokim dhe kërkesa për një kishë nuk është vetvetiu nxitje e përçarjes.
E tani, një pyetje hipotetike për «Zërin e Vushtrrisë» dhe portalet e ngjashme: Cila është qendra juaj e orientimit editorial — Beogradi, Ankaraja, Katari apo Kandahari?
Pyetje retorike, natyrisht; jo akuzë për lidhje të paprovuara. Por kur çdo hap drejt rrënjëve tona iliro-arbërore shndërrohet në alarm, publiku ka të drejtë të kërkojë gazetari të paanshme, fakte dhe respekt për lirinë e qytetarëve.
Sa për ne, guri i bekuar mund të jetë larguar, por kujtesa nuk zhduket. Kisha katolike shqiptare në Zogaj mbetet synimi ynë dhe do të vazhdojmë të punojmë për realizimin e saj, sipas procedurave përkatëse dhe në respekt të ligjit.
Portaleve që na përcjellin me kaq zell, u themi me ironi: faleminderit për vëmendjen! Nëse ju kushton «çmimin e çmendurisë» të raportoni për çdo hap tonin, faturën e titujve tuaj llogariteni vetë. Ne kemi punë më të rëndësishme.
Rikthimi te rrënjët nuk ndalet nga titujt e portaleve. Guri mund të hiqet, por historia nuk fshihet; kujtesa nuk shuhet dhe vullneti nuk dorëzohet!
Tempuj të kujtesës shqiptare do të ngrihen në zemër të Kosovës!
