Më 1 shtator 2025, në Afganistan ndodhi një tërmet i fuqishëm. Toka u drodh, shtëpitë u shembën, mijëra njerëz mbetën nën rrënoja.
Midis tyre gra e fëmijë, që rënkonin për jetë. Por dhimbja më e madhe nuk ishte vetë tërmeti — ishte ajo që pasoi më pas. Shpëtimtarët afganë arritën në vendngjarje, por ata ishin vetëm burra.
Ligji islam ua ndalon grave të jenë pjesë e ekipeve të shpëtimit. Po ashtu, burrave u ndalohet të prekin trupin e një gruaje. Kështu, qindra gra të mbetura gjallë nën rrënoja nuk mundën të shpëtohen. Zërat e tyre u shuan ngadalë, jo nga mungesa e ndihmës, por nga prangat e një ligji që vë poshtë jetën.
Më 8 shtator 2025, gazetarja gjermane e BILD, Karen von Guttenberg, raportoi me dhimbje sesi gratë thërrisnin për ndihmë. Ajo shkruante se shpëtimi ishte vetëm disa metra larg, por burrat nuk guxonin t’i nxirrnin. Ligji ishte më i fortë se njeriu. Në spitalin e Jalalabadit, tabloja është edhe më tronditëse: vetëm burra të plagosur marrin trajtim. Gratë, edhe pse të gjymtuara, lihen jashtë, të hedhura në një anë.
Ndersa The New York Times solli dëshminë e Ayshe-s, një vajze 19-vjeçare nga provinca Kunar. Ajo tregoi se si nënat dhe motrat e saj u lanë pa ndihmë, ndërsa burrat u morën menjëherë drejt urgjencës. Në këtë tragjedi, gjinia përcakton kush jeton dhe kush vdes. Edhe Organizata Botërore e Shëndetësisë i bëri thirrje talibanëve që të paktën në raste fatkeqësish të tilla të bëjnë përjashtime nga këto ligje çnjerëzore.
Por përgjigjja ende nuk ka ardhur. Heshtja është e rëndë, njësoj si rrënojat ku ende vdesin gra pa asnjë mëkat. Ky nuk është më vetëm një tërmet. Ky është një krim i mbuluar me gurë e pluhur, por i bërë nga njerëz.
Një mendësi primitive që mbi jetën ngre ligjin e verbër, duke i shndërruar gratë në viktima të dyfishta: të natyrës dhe të shoqërisë.
Përktheu nga gjermanishtja: Afrim Zeqiri, Gjermani (10.09.2025)
Erdbeben in Afghanistan: Frauen kämpfen ums Überleben | News | BILD.de
