E përshëndes vendimin e Gjykatës Themelore në Prishtinë për vazhdimin e paraburgimit të Fatmir Shehollit.
Për fat të keq, njerëz të parapolitikës, të lidhur me parti të dala nga lufta, rehabilituan dhe promovuan një person që prej vitesh është konsideruar si agjent i strukturave serbe të inteligjencës. Kjo u bë pa e kuptuar ose pa dashur t’i kuptojnë pasojat që veprime të tilla mund t’i sjellin shtetit, institucioneve, subjekteve politike dhe vetë elektoratit të tyre.
Unë i kuptoj rrethanat e vështira të pasluftës, mungesën e kapaciteteve institucionale dhe faktin se shumë raste të tilla nuk janë trajtuar seriozisht, qoftë për shkak të administrimit ndërkombëtar, qoftë pas mbylljes së Shërbimit Informativ të Kosovës. Nëse ky person ka qenë i identifikuar dhe i përfshirë në procese bashkëpunimi, ai është dashur t’i përcillet institucioneve kompetente, përkatësisht AKI-së, dhe të mbahej nën mbikëqyrje institucionale.
Mjerisht, parapolitika zgjodhi një rrugë tjetër. Ky individ u përdor për interesa të ngushta, për ndikim, shantazh dhe kontroll ndaj njerëzve të caktuar, pa e kuptuar dëmin afatgjatë që po i shkaktohej Kosovës. Ata zyrtarë publikë, politikanë e media që e promovuan dhe i dhanë legjitimitet publik, duket se nuk e kanë kuptuar urtësinë e vjetër popullore: “Ujku qimen e ndërron, por zanatin nuk e harron.”
Fatmir Sheholli nuk e harroi zanatin e tij. Prandaj, në këtë rast, meriton përgëzim puna e institucioneve të sigurisë dhe e drejtësisë, veçanërisht e Agjencia Kosovare e Inteligjencës dhe e Gjykata Themelore në Prishtinë, për trajtimin serioz të këtij rasti.
Kosova nuk mund të ndërtojë siguri shtetërore duke rehabilituar njerëz mbi të cilët rëndojnë dyshime serioze për veprimtari kundër interesave kombëtare.
