Në internet sapo lexova me shumë kënaqësi Esenë e shkëlqyer, me titull “Koment dhe apel” të këtyre dy intelektualëve me vetëdije të lartë kombëtare, me brymosje shembullore nacionaliste. Në këtë Ese ata i kanë bërë një vlerësim të përkryer intelektualit të shquar Skënder Kapiti, i cili simbolizon modelin e përsosur të inteligjencies mbarëkombëtare.

Në personalitetin e Skënder Kapitit mishërohet fryma intelektuale, si pjesë përbërëse e atdhetarizmit, aftësia e tij për të bërë vlerësime për mbarë botën shqiptare.

Të flasësh dhe të gjykosh për formimin intelektual të Skënder Kapitit, do të thotë të nxjerrësh në pah të tilla tipare të botës së tij shpirtërore, si vendosmëria e karakterit, gatishmëria burrërore për t’u ndeshur ballazi me padrejtësitë e qeverisjes së vendit, me mëkatet e rendit juridik, me prirjen e oligarkëve në krye të pushtetit për grabitjen e pasurive kombëtare, me pasoja të rënda në nivelin e jetesës së shumicës dërrmuese të popullit.

Aftësia e këtij intelektuali për ta parë me sy kritik realitetin, zbulon në personalitetin e tij atë tipar atdhetari, që është karakteristik për dashurinë ndaj atdheut.

“Në qoftë se rrobat që ka veshur vendi yt janë vjetruar dhe madje, në qoftë se vetëm ty, në mbarë vendin, të bie në sy vjetërsia e atyre rrobave, je i detyruar të deklarosh me zë të lartë për një gjë të tillë, në të kundërtën, ti nuk je qytetar i vendit tënd!”.

Pikërisht Skënder Kapiti është qytetar me Emër të Madh i vendit të vet.

Normalisht, zëri i tij i fuqishëm, që ka ushtuar me forcë në publicistikën e tij nacionaliste, në mbrojtje të vlerave të kombit shqiptar, duhej të ishte dëgjuar me kohë në sferat e larta të politikës dhe të shkencës shqiptare, sepse ky intelektual, i rrallë në radhët e inteligjencies mbarëkombëtare, e ka merituar me kohë të ishte anëtar i Akademisë së Shkencave në Tiranë dhe në Prishtinë dhe që Presidenti i Republikës ta kishte dekoruar me medaljen më të lartë “Nderi i Kombit”. Fatkeqësisht, një gjë e tillë nuk ka ndodhur, sepse smira e shqiptarit për shqiptarin e suksesshëm, nuk e lejon një gjë të tillë. Kjo është arsyeja kryesore, pse kombi ynë, dikur më i madhi në Gadishulln e Ilirisë, ka më shumë se një shekull që vazhdon të mbetet i copëtuar në disa shtete.