Nga: Bahri Cani
___
Presidenti Donald Trump ishte shumë i kënaqur pas takimit me Netanyahun e Izraelit, duke thënë se “kjo është një prej ditëve më të mëdha dhe më të mrekullueshme në historinë e civilizimit, sepse bëhet fjalë për çështjet që nuk janë zgjidhur me qindra apo dhe mijëra vjetë. E raportet e izraelitëve dhe palestinezëve janë të tilla”.
Trump i ka paraqitur Netanyahut një plan prej 20 pikësh për vendosjen e paqes, ndërsa Netanyahu e ka pranuar por dhe ka kërcënuar njëkohësisht. Tani mbetet që Hamasi ta pranojë. Nëse nuk e pranon, Netanyahu kërcënoi se “do ta çojë punën deri në fund”.
Pikat më të rëndësishme të planit janë, përfundimi i luftës menjëherë, lirimi i të gjithë pengejve brenda 72 orësh, lirimi i qindra palestinezëve nga Izraeli, tërheqja graduale e ushtrisë izraelite, Hamasi nuk duhet të luajë më kurfarë roli politik dhe duhet të dorëzojë armët, ata që dorëzojnë armët do të amnistohen, armëpushimin duhet ta mbikqyrë përkohësisht një Komitet teknokratik dhe jopolitik i mbikqyrur nga faktori ndërkombëtar…
Netanyahu është dakorduar me këtë plan. Ai është përshëndetur edhe nga shumë vende, ndër to edhe nga Gjermania. Ndërsa vetë Trumpi tha se ky është një “shans i mirë për palestinezët”, por edhe ai e di që zbatimi i planit nuk do të jetë i lehtë.
Vendosja e paqës nuk është e thjeshtë, siç tha, sepse gjendja në Lindjen e Mesme është ndër më të vështirat dhe më të komplikuarat në botë.
Trumpi tha se palestinezët mund ta pranojnë planin ose të mos bëjnë asgjë, por kjo ka të bëjë me fatin e tyre. Ndërsa Netanyahu tha se “ky plan realizon synimet e tyre ushtarake, sepse lirohen të gjitha pengjet, shkatërrohen aftësitë ushtarake të Hamasit dhe i jep fundit sundimit politik të Hamasit, në mënyrë që Gaza të mos paraqesë kurrë më rrezik për Izraelin”
Ai kërcënoi se do të “çojë gjërat deri në fund, nëse Hamasi nuk e pranon këtë plan”.
Një vendim tjetër me rëndësi është edhe ky: Netanjahu ka premtuar se më nuk do ta sulmojë Katarin. Këtë vendim dhe këtë takim e ka përshëndetur në një bisedë telefonike me Trumpin edhe kryeministri i Katarit Abdulrahman Al Thani.
