Deklarata e Kadri Kryeziut, se “Feja islame në Kosovë ka dalë nga shtrati, ka vërshuar nga shtrati”, është një sinjal i qartë alarmi

Deklarata e ish-nënkryetarit të Gjykatës Kushtetuese, intelektualit dhe veprimtarit të njohur, profesor Kadri Kryeziu, se “Feja islame në Kosovë ka dalë nga shtrati, ka vërshuar nga shtrati”, është një sinjal i qartë alarmi dhe një akt kurajoz intelektual. Kjo deklaratë, e bërë në tryezën e organizuar nga Organizata “Shqiptaria” me temën “Feja dhe Shteti”, është një thirrje për kthim në arsyen kombëtare dhe respektimin e karakterit laik të shtetit.

Në këtë tryezë, profesorë, akademikë dhe njohës të fushës theksuan rëndësinë e ruajtjes së ndarjes së qartë mes fesë dhe shtetit, si dhe domosdoshmërinë e mbrojtjes së Kushtetutës nga çdo tentativë për islamizim të hapësirës publike e shoqërore.

Fjalët e profesor Kadri Kryeziut janë një dritë për shoqërinë shqiptare, e cila prej vitesh po përmbytet nga propaganda e islamit politik, që përpiqet të zëvendësojë dritën e dijes e progresit me errësirën mesjetare të Lindjes. Ai tha qartë atë që shumë të tjerë e mendojnë, por s’kanë guximin ta thonë: është koha të ndalet vërshimi i ideologjisë fetare që po zë frymën e kombit.

Reagimet e disa individëve që u distancuan nga profesori nuk janë gjë tjetër veçse refleks i frikës dhe robërisë mendore. Kur dikush reagon kundër fjalës së lirë dhe mendimit kritik, ai në thelb po thotë: “duam të qëndrojmë në terr, mos na shqetësoni me dritë.”

Por kombi shqiptar nuk mund të mbetet peng i këtij terri. Ai ka lindur në dritën e Rilindjes Kombëtare, mbi vlerat e arsyes, dijes dhe qytetarisë perëndimore. Prandaj, qëndrimi i Kadri Kryeziut dhe zëri i çdo intelektuali që mbron karakterin laik të shtetit janë garanci se Kosova nuk do të bjerë pre e ideologjive fetare të importuara, të ushqyera nga armiqtë historikë të shqiptarëve.