Nga: Luan Dibrani
Në një moment historik për sportin shqiptar dhe për Republikën e Kosovës, Dr. Astrit Hasani, nga fshati Prapashticë i Prishtinës, është zgjedhur President i Federatës Evropiane të Peshëngritjes (EWF), në Kongresin Zgjedhor të mbajtur në Chisinau, Moldavi. Ky është një moment i rëndësishëm, jo vetëm për sportin evropian, por edhe për identitetin kombëtar të shqiptarëve, pasi për herë të parë në histori një shqiptar merr drejtimin e një federate evropiane sportive.
Dr. Hasani është shembulli i njeriut që ka ndërthurur me mjeshtëri edukimin superior, vlerat kombëtare dhe përkushtimin për sportin dhe atdheun. Me magjistraturë të përfunduar në Universitetin prestigjioz të Kembrixhit, doktoraturë në Universitetin e Varshavës, dhe me një karrierë të gjerë akademike si ligjërues e ekspert në fushën e sportit, Astriti ka ndërtuar një profil ndërkombëtar të respektuar.
“Ylli i Artë” nga Prapashtica
Vitin e kaluar, në Kongresin Evropian të mbajtur në Varshavë, ai u nderua me çmimin e madh “Ylli i Artë”, një vlerësim që përfaqëson jo vetëm suksesin individual, por edhe rrugëtimin e një populli që përmes sportit po afirmohet në skenën ndërkombëtare. Tashmë, Astriti – apo siç po njihet ndryshe “Ylli i Artë” – do të udhëheqë Federatën Evropiane të Peshëngritjes, duke përfaqësuar jo vetëm sportin, por edhe shtetin e pavarur dhe sovran të Republikës së Kosovës.
Prapashtica – Një vatër e dijes dhe patriotizmit
Dr. Hasani është një bir i denjë i Prapashticës, një ndër fshatrat më të njohur e më përparimtare të Malësisë së Gollakut, i cili historikisht ka dhënë intelektualë, luftëtarë dhe figura të shquara që gjithmonë kanë qenë në ballë të përpjekjeve për liri, drejtësi dhe zhvillim kombëtar.
Prapashtica është tokë e shenjtë për ata që e njohin historinë e Kosovës – një vend që ka rritur bij që e kanë dashur dhe i kanë shërbyer atdheut me krenari, dije dhe përkushtim.
Kontribut në ndërtimin e shtetit të Kosovës
Arritjet e Dr. Hasanit nuk janë thjesht suksese personale – ato janë gurthemel i ndërtimit të Kosovës si shtet i denjë, i barabartë në arenën ndërkombëtare. Ai është dëshmi se përmes edukimit, përkushtimit dhe vizionit, qytetarët e Kosovës mund të arrijnë majat më të larta të suksesit global, në të gjitha sferat e jetës.
Me zgjedhjen e tij si President i Federatës Evropiane të Peshëngritjes, Astriti ka shënuar një kapitull të ri në historinë e sportit dhe të kombit tonë – një kapitull që shkruhet me krenari, përkushtim dhe me një ndjenjë të thellë përgjegjësie ndaj brezave të ardhshëm.
Urime Astrit – krenaria jonë kombëtare!
Populli i Kosovës, sportistët, intelektualët dhe të gjithë ata që besojnë në një të ardhme të ndritur, i urojnë Dr. Astrit Hasanit suksese të reja në udhëheqjen e sportit evropian.
Le të jetë suksesi i tij një frymëzim për çdo të ri nga Kosova, që beson në ëndrrat e veta dhe është i gatshëm të punojë fort për to.
